Amashishini waseMbhashe aqaphele inyanga yamafama namagugu

10 September 2026 | Anele Raziya | Mbhashe

Abenza imisebenzi yeezandla efana nokuhlohla iintsimbi, uthunga impahla, ukuvelisa isepha yokuvasa izitya, ukwenza i-peanut butter, amafama alima imifuno nala afuyileyo imfuyo, aye afumana ithuba  lokuqaphela inyanga yamafama namagugu esizwe (Heritage month) nekwayinyanga yezokhenketho (tourism month) ngokuthi asindleke umsitho wokubonisa ngeezinto azivelisayo eMbhashe. 

Kwiveki ephelileyo kuGatyane kwiholo esedolophini bekudityaniswe wonke ubani owenza umsebenzi weezandla namafama bezobonisa ngeezinto abazivelisayo  kwaye bekwaxhotyiswa nangeezinto ekumele bazenze ukhulisa amashishini wabo. 

Umsitho ubuququzelelwa liqumrhu, i- Eastern Cape Development Corporation (ECDC) ebambisene nomasipala waseMbhashe eDutywa nalapho bekuhanjwa ngaphezulu kwesihloko esithi Amathole Agricultural and Food Trade Fair. 

Amashishini abezimase umsitho ebengaphaya kwe100 kwaye onke ebephethe izinto azivelisayo. 

Kwincoko ibiphakathi kwamashishini, ECDC nomasipala bekujongwa indlela zokuncedisa ukuze aphuhle nangakumbi amashishini waseMbhashe. 

UNomawethu Ntantala waseDutywa kwilali yaseRhwantsini nokhokhela iSombhida Small Holding Farm, uthe ngexesha kuqhuba umsitho baye baxhotyiswa ngendlela ekumele bazilandele amashishini waboakhule nangakumbi kwanye nangendlela zokuphucula imveliso zabo. 

“Unxebelelwano phakathi kwabo bengosomashishini nokucela amacebiso xa edingeka zizinto ekuthiwe zibalulekile ezo,” kutsho uNtantala. 

Uthe ngokomnqweno wabo bengosomashishini eMbhashe kukuba bavelisa phantse zonke izinto kwindawo yabo njengoko bezibona benaso isakhono sokwenza oko. 

Uqhube wathi ininzi into eveliswa eMbhashe ngoosomashishini kwaye lonto iyabonakalisa ukuba bangakwazi ukuvelisa nezinye izinto abazithenga ngaphandle eMbhashe zitsho zithengisww kwidophu zabo. 

Usodolophu waseMbhashe, uGqirha Samkelo Janda ethetha noosomashishini, uthe uMbhashe akukhonto ungenayo xa ujonga kwicala lamagugu namafa kunye nakwezonkekhetho. 

“Sinayo indalo entle efana namalwandle eMbhashe kwaye sinazo neendawo zamafama namagugu esizwe,” kutsho uGqirha uJanda. 

Uthe into ebalulekileyo kukuba kulondolozwe indalo eMbhashe kwaye abantu bawasebenzise amalwandle ukuzenzela amashishini. 

Enye into uthe kubalulekile ukuba amashishini axhasane ewodwa kwaye aze nangaphambili kwamasipal azokujonga inkxaso. 

Kwizinto ezibonisiweyo ngalemini, bekukho izitena zeeblocks, imifuno, peanut butter, isepha yovasa izitya, imbotyi kuquka nezinye izinto. 

Ukanti amashishini ebebonisa ngezinto aquka iSombhida Small Holding Farm, Ndlovedligoduka Primary Co-operative,  Kingdom Financial Institute, Willowvale Arts Centre, Andinakuzibuza na Multi-purpose Primary Co-operative, JK Mabohlo Rabbit Farming,Nosintu Foundation, Likhona Lethu Services Pty Ltd (Agro-Processing), M&B Projects namanye. 

Oka Ntantala uthe bayibulela kakhulu inkxaso abayifumene kurhulumente kwaye bafunde nangendlela zoluthengisa emakethe ingakumbi kwezo zingaphandle kwase Mbhashe kwaye uthe bajongele phambili nasekuncediseni ukhulisa uqoqosho lasekuhlaleni. 

Ukuvula kwabo amashishini ukuchaze njenge nzame zokunciphisa izinga ledlala ingakumbi kwindawo ezisemaphandleni.