UZungula ufumene umnxeba kwisigwinta esifuna ukumbulala

UVuyo Zungula onguMongameli weAfrican Transformation Movement (ATM) utyhola ngokuba kukho abantu abamfuna efile. Ubanga ngelithi ufumene umnxeba kwisigwinta esiqeshelwe ukuba simgqithise amafu. UZungula uthi lo mnxeba uwufumene ngoMvulo wale veki efowunelwa yindoda ethi iseFreyistati iqeshwe yindoda esePitoli ukuba imxhwile ize kamva imgwinte.

UZungula uthi akanazo ezinye iinkcukacha kodwa le ndoda ebimtsalela umnxeba imlumkise ngemoto eluhlobo lweFord Ranger enenombolo mbhalo yaseLesotho. “Ndizakuya kunika ingxelo emapoliseni, kwaye kuyacaca ukuba kufuneka ndiqaphela. Asiyonto onokungayihoyi le,” kutsho uZungula. Kusenjalo kukho ingxelo zokuba iofisi ye-ATM eseMthatha ziqhekezwe amatyeli amathathu kwiveki ezimbini, kwebiwa amaxwebhu abalulekileyo ombutho. “Olu qhekezo ndiloyamanisa nepolitiki. Alikho isela elinokuqhekeza endaweni enye amatyeli ade abemathathu. Kukho lamaxwebhu bawafunayo bangade bawafumane,” kucacisa uZungula.

Esi sigwinta sithe aba bantu basiqeshileyo ukuba sibulale uZungula basityala imali ngomsebenzi esasiwenze kwiphondo iKwaZulu Natal.UZungula urhanela amalungu e-ANC kweli gumgedle lokumbulala. I-ANC ithi makeze nobungqina obuseka ezi zityholo. UZungula uthi le ndoda imxelele ukuba abaqeshi bakhe ngosozigidi kwaye zange bachaze ukuba yintoni isizathu sokuba bafune ukumbulala.

UZungula uthi nangona umbutho wakhe unezihlalo ezibini qwaba epalamente eKapa kodwa inkulu indima oyidlalayo kwezepolitiki. “Singumbutho okhulayo maxa wambi kude kubekho abantu abafuna ukusixabhela abasoyamanisa noJacob Zuma noAce Magashule,” esi sibini athetha ngaso sakreqa kwi-ANC saseka imibutho yaso.