Umsebenzi wasemagqwetheni ubanjelwe ubuqhophololo

Inenekazi laseMthatha elineminyaka engamashumi amane anesine elisebenzela umzi wamagqwetha libanjelwe ukuxhwila ophunyelwe yimali yakwa-RAF. Ngokwamaxhwebhu enkundla ixhoba lafaka ibango lemali yengozi yemoto lincediswa ngala magqwetha.

Imali yaphuma ngomhla wesibini kuNovemba wonyaka ophelileyo. Kuvakala ukuba yathi yakuphuma imali umrhanelwa waphathwa sisifuthufuthu watsalela umnxeba isinqanda mathe sakhe, baze bapheka igumgedle lokubhonyula le mali yexhoba. Ingxelo ihambisa ithi ngomhla wesithathu kuNovemba umrhanelwa wandwendwela ixhoba kwikhaya lalo kuTsolo ezenza otyalwa imali lixhoba. Ngelishwa ixhoba lalingekho ngalomini.

Nesinqandamathe somsolwa saye salindwendwela ixhoba sih amba ngemoto eluhlobo lwe-VW Polo ze baqweqwedisa ixhoba ukuba liye kungena emotweni namakhadi ebhanki kunye nesazisi. Ixhoba libalisa lithi lanyanzeliswa ukuba likhuphe imali enye liyithumele kwibhanki yomrhanelwa. Ixhoba kukholeleka ukuba laphulukana nemali engange-R290,000.

Ixhoba lakwazi ukubhungca kwindawo ebeligcinwe kuyo layovula ityala emapoliseni. Ngentsebenziswano phakathi kweProvincial Kidnapping Task Team ye- Hawks, iMthatha National Intervention Unit (NIU) kunye neMthatha Criminal Local Record Center (LCRC) ziqokelele ubungqina obukhokelele ekubanjweni kwezi zithandani zinyolukileyo.