Ibulewe ngamapolisa indoda egwaze yabulala ipolisa
30 EyeNkanga 2023 – 06 EyoMnga 2023 – Monwabisi Khininda
Aliwal North
Amapolisa aseMpuma Kapa azilele ukubhubha kogxa wawo ogwazwe ngumrhanelwa ngentlazane yangoLwesibini, weveki ephelileyo eAliwal North, eMpuma Kapa.
Ngokwengxelo ekhutshwe ngamapolisa ilungu lecandelo lePublic Order Policing (POP) uCaptain Mawethu Mantshiyose ubhubhele emsebenzini ngethuba amalungu kaPOP eyoncedisa ukubamba umrhanelwa obendlongo-ndlongo efunwa kwilali iNdingunya eTyhinindini eAliwal North. Ingxelo iqhuba ithi umrhanelwa obefunwa mayela netyala lokubetha ngenjongo zokonzakalisa umzimba ngokumanyumnyezi uphume esisifu ngumsindo ephethe umkhonto nemela wonda ngamapolisa.
Isithethi samapolisa eMpuma Kapa uCaptain Priscilla Naidu uthi le ndoda igwaze uCaptain Mawethu entanyeni wawa phantsi.Ngethuba esondela efuna ukumgwaza kwakhona umrhanelwa udutyulwe wabulawa ngamapolisa. UCaptain Mantshiyose ubalekiselwe kwiziko lempilo elikufuphi apho abhubhele khona ngenxa yamanxeba okulimala.
Ukanti umrhanelwa ubhubhele kwindawo yexhwayelo. Ityala lokubulala nelophando (inquest) avuliwe kwisikhululo samapolisa ePhumalanga. UMkomishinala wamapolisa ephondweni uLt. Nomthetheli Mene udlulise amazwi ovelwano kusapho lwepolisa, izihlobo noogxa balo.