Amapolisa abambe indoda neziyobisi kuKomani 

Kulindeleke avele enkundleni yamatyala kuKomani kuleveki umrhanelwa oneminyaka engamashumi amahlanu anesihlanu ubudala kulandela ukunqakulwa kwakhe ezintsitheka ziziyobisi ngeCawa. Ingxelo yamapolisa idize ukuba amapolisa abambe umrhanelwa emva kokufumana iinkcukacha ngokuthengisa kwakhe iziyobisi.Afumene kuye iziyobisi eziluhlobo lweMandrax ezingaxabisa izigidi ezilithoba (R9 million).

Ngelisebenzisa iphulo lezobuntlola,amapolisa ecandelo i-K9, noonogada bakwaRed Guard balandele isithuthi esiluhlobo lwe-Isuzu Truck ekutyholwa ukuba besithutha iziyobisi ukusuka eGoli ukuya eMonti. Eli qela lamapolisa libone esi sithuthi kwindlela esingisa eCathcart/eKomani aze akwazi ukusimisa. UCapatain Namhla Mdleleni osisithethi samapolisa uthi ngethuba amapolisa eqhuba uphando athe asigqogqa afumana iibhegi zeziyobisi zeMandrax eziyi-111 ziqulethe iwaka leepilisi eziqikelelwa kwizigidi ezilitoba zerandi.

Amapolisa athathele kuwo nesithuthi salendoda ebikhwelise kuso ezi ziyobisi.Umrhanelwa utyatyekwa ityala lokufinyanwa nokushishina ngeziyobisi. UMkomishinala wamapolisa kwisithili i-Chris Hani uMajor General Rudolph Adolph uqwabele izandla uluntu oluhlebele amapolisa ukuze kubanjwe umrhanelwa ofunyenwe neziyobisi ebezizothengiswa kwizitalato zeliphondo.