Ugabadele uZwelibanzi ngokugxotha iiNkosi

Intatheli: Monwabisi Khininda |

Ukugxekwa kukaKumkani Zwelibanzi Dalindyebo nguNkosi Mandla Zwelivelile Mandela ngoqhogwano lwakhe nelizwe lakwaSiyareli kukhokelele ekubeni iKumakani imgxotshe njengeNkosi yaseMvezo waze wagxotsha nezinye iiNkosi ezimbini athi zazingafanelanga ukuba ziiNkosi. Enye iNkosi egxotshiweyo nguNkosi Vulithuba Sangoni osuka kwindlu yasebukhosini yamaQiya. Esi sibhengezo usenze ngethuba esamkelwa njengelungu lombutho we-ATM (African Transformation Movement) eMthatha kutsha nje.

Isebe loLawulo ngeNtsebenziswano neMicimbi yeMveli eMpuma Kapa lithi isigqibo sikaKumkani sokugxotha iiNkosi ezintathu ubuncinane kukuphuca nje nokubhibhidla amazinyo. Eli sebe lithi uKumkani Zwelibanzi Dalindyebo akanalo igunya lokugxotha nayiphi iNkosi ngaphandle kokufukana imilomo neNkulumbuso yephondo uOscar Mabuyane naye lowo aye wathi uyamgxotha. Osisithethi selisebe uPheello Oliphant uthi ezinkosi kuthiwa zigxothiwe zizohlala ezikhundleni zazo zenze umsebenzi wazo wesiqhelo.

“IKumkani ayinawo amandla okugxotha nayiphi iNkosi,zizakuhlala ziphethe kwiindawo zazo zisenza imisebenzi ngokomgaqo wesebe. Sinethemba iKumkani  neeNkosi bazophuma nesisombululo,” kutsho uOliphant. Kanti isizwe samaQiya naso siphendule kwingxelo yaso sisithi ichanti lingaphuma emini libonwe ngabafazi ukuba bangavumela kugxothwe iiNkosi zabo. Batsho besithi bakulungele ukufundisa iKumkani ngendlela ekuphathwa ngayo imicimbi yemvelo ukunqanda okufonyoza kuqhubekayo okukhokelele emisindweni.