Amapolisa amhlangule obexhwilelwe imali ka-RAF
13 August 2026 | Monwabisi Khininda | Libode
Amapolisa aseLibode ayisindisile kubaxhwili indoda ekumashumi amathathu anesibhozo eminyaka ubudala ebisanda kuphunyelwa yimali yamathambo yakwa-RAF. Le ndoda engumhlali welali iMsintsi, eLibode ifikelwe zizijem-jem zamadoda afike ayibamba ayinkula kanobom aze ayibopha izandla nenyawo ayijula emotweni. Ngethamsanqa esi sithuthi sohlobo lweDouble-Cab simiswe ngamapolisa abekwipatrol. Ngokutsho kwamapolisa kwisithuba sentsimbi yeshumi ebusuku amise imoto kwilali iMsintsini. Ngokuya esondela amadoda aliqela aphume kwesi sithuthi athi saa okwamantshontsho ezagwityi, ukutshona emetyholweni. Umqhubi oneminyaka engamashumi amathathu anesihlanu ubudala uthe wanqakulwa ngamapolisa. Ngethuba egqogqa ephengulula isithuthi afumene ibotshwe izandla neenyawo inempawu zokubethwa kanobom. Iye yabalekiselwa esibhedlele ukuya kufumana unyango.
Isithethi samapolisa uKapteni Welile Matyolo uthi uphando lokuqala lwamapolisa lubhentsise ukuba ixhoba belifumene isixa-mali esiyintlawulo yakwa-RAF kwaye beseliphangwe imali engachazwanga. UMatyolo uhambisa athi abarhanelwa bebesendleleni eya kukhupha enye imali ngethuba begagana namapolisa. Umrhanelwa obanjiweyo kulindeleke avele enkundleni yamatyala eLibode apho azakujamelana namatyala okuqweqwedisa nelokuphanga. UMatyolo uthi kungongezwa namanye amatyala ngokuya kuqhuba uphando.
UMkomishinala wamapolisa kwisithili i-OR Tambo uMajor General Norman Modishana udlulise umyalezo otsolileyo kuluntu ngelithi malungathi pahaha iinkcukacha ngemali ephumileyo njengoko oonqevu besoloko bevule amehlo begade amaxhoba angavundlanga.
