Abemi beli bathi mazivalwe iispaza shops zabemi bangaphandle
12 EyeDwarha 2023 – Intatheli kaDizindaba
GAUTENG
Abahlali base Naledi apha eSoweto bavutha “Bhee” ngumsindo kwaye bamemelela okokuba zivalwe iispaza shops zabemi bamazwe angaphandle. Lo ibe ngumvuka emveni kokusweleka kwabantwana ababini nekuthiwa baye batya ibiscuit ezthengwe kwezi venkile. Kuvakala okokuba bane bebonke abantwana abafunda uGrade 1 abathe batyatyaza ngokoyikisayo emveni koku baze ababini kubo basweleka kwangoka logama abanye ababini base Chris Hani Baragwanath Hospital. Kuvakala okokuba nemeko yaba babini imaxongo ngoku besesibhedlele.
Oku kubone abahlali base Naledi besenza imingcelele yoqhankqalazo kwaye bevutha “Bhee” ngumsindo bekhalazela abemi bangaphandle ngokuthengisa ukutya okudala kwaphelelwa lixesha. Oku kuye kwanyanzelisa okokuba kubekho amapolisa amaninzi ajonge imeko yaye isithethi samapolisa eGauteng uColonel Dimakatso Nevhuhulwi siye saqinisekisa okokuba kuvulwe uphando ngesi siganeko. UNevhuhulwi uthe: “Amapolisa asaphanda izityholo ezibini emveni kokuba iintsana ezimbini neziminyaka mihlanu nemithandathu zither zasweleka esibhedlela kusuku lweCawe engaphambili. Okwangoku asikaziwa isizathu sokusweleka kwezi ntsana,” utshilo uNevhuhulwi.
Ukanti kwelinye icala uMphathiswa wezeMfundo eGauteng uMatome Chiloane uthe ubuhlungu kakhulu kukusweleka kwamakhwenkwana angala mabini ka Grade 1 nabefunda eKgauhelo Primary School kunye nase Karabo Primary School eSoweto. Kwangaxesha liney uye wabongoza abazali okokuba baziqaphele izinto ezithengwa zezityiwe ngabantwana kwezi venkile.
Abasemfuthweni wolwazi bathi esi siganeko saba bantwana sibonakale sivuselela ikhwelo kwaye silikhuthaza ukuba zivalwe ezi venkile zabemi bamazwe angaphandle. Yena ubawo uMadoda Ndenze walapha eNaledi uthe: “Okoko kwathi kwaphatha lo Rhulumente weANC kwaba ngu “Vula zibhuqe” kweli lizwe lethu bengena ngaphandle kwamaphepha mvume abaninzi babo zebuvala “Mba” ezo spaza shops zoo mama noo tata beli lizwe lethu. Ikhaya lam emva lise Qweqwe eMthatha yaye ndothuka kakhula xa ndigodukile ndaya ndabona iivenkile ezazisaziwa zoo Sibaya, Dikweni, noo Mzolo zavalwayo ngenxa yezi ntlanga. Nokuba kungathwani kwakukho ulawulo nokhuseleko ngexesha lika Nkosi uMatanzima,” utshilo lo bawo.
Ukanti kusenjalo kuvakala okokuba naphaya eKapa eGuguletu iivenkile zoo Gasela nabanye phaya eNY6 sele zavalwa ngoku kuphethe abemi bangaphandle nabangarafiyo kweli.
