UDSRAC ukhuthaza ababhali
10 EyeDwarha (Oct) 2024 – 23 EyeDwarha (Oct) 2024
Monwabisi Khinindaba
Isebe leZemidlalo uBugcisa uBuchule noLonwabo eMpuma Kapa likwiphulo lokuphuhlisa izakhono kubabhali ngokuthi ibapapashele iincwadi liphinde lizithenge ukuze zithunyelwe kumathala eencwadi kweli phondo.Oku kudule kwintetho yoMphathiswa weli sebe uSibulele Ngongo obesothula intetho kwitheko looncwadi (Book Fair). Lo msitho okunyaka wesibini uqhutywa nobuntsuku mbini, ububanjelwe kwiziko lakwaAudi eMonti.Kuchongwe imibhalo- ngqangi (manuscripts) engamashumi amabini ezakupapashwa lisebe. Ezoncwadi zakuthi ziphehlelelwe kuMnyhadala kaZelonke woBugcisa neNkcubeko (National Arts Festival) eMakhanda kunyaka ozayo. Ababhali abahlanu banikwe izipho zekhompyutha eziphathwayo (laptops) ebezikhutshwe ngumzi wakwaMetropolitan,ukuze kubelula ukubhala.
UMphathiswa wakwa-DSRAC uSibulele Ngongo uthe lo msitho bubungqina bokuzimisela kwesebe ekuxhaseni ababhali beli phondo.Uthe belisebe baxhasa ababhali bekwakhulisa ababhali ngokuthi basingathe iintlanganiso zocweyo (workshops), nokuncedisa ababhali ukuba iincwadi zithengiswe zifikelele kuluntu. UMphathiswa uthembise ukuba bazakusebenzisana nesebe leZemfundo ukuze ezinye zezincwadi zithengwe lisebe ukuze zifundwe ezikolweni.
Isebe liye lahlanipha uqweqwe wombhali UNjingalwazi P.T Mtuze ovelise iincwadi eziliqela. UNjingalwazi Mtuze ukhuthaze ababhali ukuba babhale ngesimo sentlalo yalamaxesha. Ukhalime ukutshabalala kolwimi lwesiXhosa esitsho nokuthi luxanduva lwababhali ukukhusela olulwimi lulilifa lethu. “Mna ndibhala ikakhulu ngamava wam phantsi korhulumente wengcinezelo.”
Kusuku lwesibini bekuhlangenwe kwiziko iMandla Makupula Leadership Institue. Kuye kwabanjwa iintlanganiso ababhali abanamava beqwalasela iingxaki abathi bahlangabezane nazo ababhali abakhulayo nabo banamava. Ezi ngxoxo bezikhokhelwe zizifundiswa ezingoNjingalwazi Ncedile Saule, Njingalwazi Pamela Maseko ngoGqirha Vuyani Booi.Bebonke bangqinelene kwelokuba ulwimi lwesiXhosa luyatshabalala kwaye amaziko emfundo enomsila anesandla ekubulaleni olu lwimi. UNjingalwazi Ncedile Saule uthe yayizinjongo zorhulumente wengcinezelo ukwahlula iilwimi ezinje ngesiMpondo, isisHlubi, isiXhesibe ukuze zingakhuli. “Nalo urhulumente wenkululeko akukho nto ayenzileyo ukuphuhlisa ezinye iilwimi eziphantsi kwesiXhosa.” UNjingalwazi Zanemvula Zakes Mda onguMhlohli kwiyunivesithi yaseOhio eAmerika ukhutshaze ababhali ukuba bamanyane ukuze nabo bakhetha ukuzipapashela iincwadi zabo zibe zidlule kwizandla zababhali abanamava.
