URAF uxhobisa ulutsha ngezakhono
NguMonwabisi Khininda
Iqumrhu uRoad Accident Fund uxhobisa ulutsha ngezakhono zokufundisa uluntu ngokhuseleko ezindleleni. Seyingabantu abatsha abakwi-173 olungasebenziyo oluzuze uqeqesho kwi-RAF’S Comprehensive Road Safety Programme kulamaphondo iLimpopo, Gauteng, KwaZulu-Natal neMpuma Kapa. Olu lutsha luncedisa abafundi ukunqumla imigaqo ekuseni nasemalanga ukuphuma kwezikolo. Lupeyinta izilwanyana ngemibala egqamileyo ukuze zibonakale ebusuku zingadali iingozi kubaqhubi bezithuthi, bagece nokhula ecwakwendlela baphinde bafundise abafundi ngokhuseleko ezindleleni.
Kukho inkxaso mali esungulwe ngoAgasti ka-2023 inika ingqwalasela kubantu abahlala ngasezindleleni apho kukho amanani aphezulu eengozi zendlela. Eli phulo libandakanya amakhuphiswano ngokhuseleko ezindleleni. Izikolo eziphumelele olu khuphiswano ziye zivuzwe ngeekhompyutha, iiprinta, ipeyinti, imibhobho yokukhwaza nencwadi ezifundisa ngokhuseleko ezindleleni. Amaphulo aquka ulutsha aqaliswe ngomnyaka wama-2024 kuJulayi, ulutsha lufumana nesibonelele sentlawulo ukuze luqhube lamaphulo.
Olu lutsha luyafumeneka eNyavini, Thohoyandou, Lebowakgomo (Limpopo), Soweto, Soshanguve (Gauteng), Umlazi nakwaDukuza (KwaZulu-Natal) naseMthatha (eMpuma Kapa). Kuzo zonke ezindayo abantwana besikolo, abantu abadala nabantu abagogeke ngokwamalungu omzimba bayancediswa xa bewela indlela. Ulutsha oluyinxalenye yalenkqubo ye-Youth Driver Development Programme luye luzuze uqeqesho lwasimahla, luncediswe ukufumana iincwadi zokuqhuba neProfessional Driving Permit (PrDP).
UCollins Letsoalo oyi-CEO kwa-RAF uthi: “Sinebhongo neqhayiya ngokuququzelela inkqubo yolutsha olungonozakuzaku bokhuseleko ezindleleni. Le nkqubo ibonakalisa ukubaluleka kwentsebenziswano noluntu ukukhuthaza ukhuseleko ezindleleni. Ziyasikhuthaza nathi iingxelo zempumelelo yeliphulo nabazali abaqinisekileyo ukuba abantwana babo, abawela imigaqo xa besiya esikolweni, basezandleni ezikhuselekileyo.” Iphulo leComprehensive Road Safety Programme liqhutywa ngokubambisana neSafer South Africa Foundation. Xa kusenzeka abantwana babandakanyeke kwingozi yendlela unokuqhakamshelana no-RAF ku-0878201111 ngoMvulo ukuya ngoLwesihlanu ukusuka kwintsimbi yesibhozo ukuya kwintsimbi yesine. Abo bafaka amabango omonzakalo bangaqhakamshelana no-RAF’s Contact Centre kwinombolo kaWhatsApp engu-0716054707 neSMS ku44930 okanye bathumele i-email kucontactcentre@raf.co.za nakwiofisi zakwa RAF kuzwelonke; iinkcukacha ziyafumeneka kule website www.raf.co.za
