Amapolisa akhangela ababulali 

Intatheli: Monwabisi Khininda

Amapolisa aseMpuma Kapa athe bhazalala ekhangela abasolwa kwityala lokubulawa kwabantu abathathu eNdevana,eZwelitsha kwiveki ephelileyo. Ngokwengxelo yamapolisa amaxhoba amane aneminyaka ephakathi kwamashumi amathathu kutyholwa ukuba ahlaselwe ngabahlali kwaze kwasweleka amadoda amathathu.Ingxelo ithi amapolisa afike afumana izidumbu zamadoda amabini aze amadoda amabini abalekiswa esibhedlele. Omnye wesi sibini ufike wasweleka, kanti omnye uchacha kuhle esibhedlele. Akukho mntu oselebanjiwe malunga nesi siganeko, nophando lwamapolisa luyaqhuba.

Ibambela loMkomishinala wamapolisa eMpuma Kapa uMajor General Thandiswa Kupiso usigxeke kabukhali esi sehlo ekubonakala ikukuthathela umthetho ezandleni ngabahlali. Ucebise abahlali ukuba basebenzisane namapolisa bangathatheli umthetho ezandleni kuba oko kukwaphula umthetho. UKupiso uthe unethemba lokuba ababulali bazakunqakulwa bajamelane nengalo yomthetho. “Sinabecuphi abanamava abazinikezeleyo emsebenzini. Kungekudala bazakubanjwa ababulali.”