Iqela lomxhentso libhiyozela amashumi amahlanu eminyaka

Monwabisi Khininda | Mpuma Koloni

Iqela lomxhentso iSivuyile Nonzame Traditional Dance Group lifince iminyaka engemashumi amahlanu lisonwabisa abantu ngomxhentso, ingoma nokugcina inkcubeko yesiXhosa. Eliqela lasungulwa ngongasekhoyo uNomalungelo “ Mam Lungie” Bonga ngomnyaka we-1976. Lazaliseka iphupha likaBonga xa eliqela lisonwabisa abantu kweli lizwe nakumazwe aphesheya. “Kwicala lokugcina inkcubeko sihamba phambili kwaye sisekhondweni elihle,” uMam Lungie wayedla ngokutsho ekhuthaza ukuxatyiswa kwenkcubeko. Imfundiso yakhe yabanempembelelo kwimbongi uZolani Mkiva, uGqirha Lusanda Mcinga, uBethusile Mcinga nembongi uSilindile Mngomeni.

Eliqela selisuka konwabisa izihlwele kumazwe angoBrazil, Bulgaria, USA, France, Mexico, Madagascar naseKenya. Ngomnyaka wama-2010 ngethuba kudlalwa indebe yebhola yehlabathi 2010 Fifa World Cup kweli lomdibaniso umfanekiso wakhe wawuxhonywe ukwamkela iindendwe. UNomalungelo wayityala lemfundiso ebantwaneni bakhe uLuleka noNcumisa abaqhubela phambili eliqela. Eli qela libhiyozela leminyaka emingaka ngokukhupha icwecwe elithi ‘Ndivusweyingoma’ elinengoma ezilishumi elinesibini.