Abafundi baphume ngesininzi beyoxhasa ugxa wabo otyholwa ngokudlwengula
17 August 2023 – Monwabisi Khininda
EMTHATHA
Abafundi bezikolo ezingqonge uMthatha kwiveki ephelileyo bebephume ngesininzi beyoxhasa uOvayo Ndaku (18) ongumfundi wesikolo iAttwell Madala, otyholwa ngokudlwengula omnye umfundi onama-17 ubudala. UNdaku kutyholwa ukuba wadlwengula le ntombazana ekwangumfundi eAttwell Madala, ngomhla we-29 kuThsazimpuzi kulonyaka.Kwiveki esisuka kuyo uOvayo ebevele kwinkundla kaMantyi eMthatha oyokwenza isicelo sebheyile.Abafundi baseAttwell Madala bebephume ngesininzi bexhaswa ngabaseSt.Johns College nabaseExcelsior. Aba bafundi nabakholelwa ukuba uOvayo akanatyala bebeyonyanzelisa inkundla ukuba makakhutshwe ngebheyile.UOvayo wanqakulwa wavalekwa ngomhla we-26 kwinyanga ephelileyo. Ngokoxwebhu lwesimangalo umtyholwa wasenza esi siganeko eNorth Crest ngethuba bezonwabele nabanye abafundi.
Umphandi wetyala uSajini Nomaphelo Tshikila uxelele inkundla ukuba ixhoba latsalela umama walo umnxeba ngentseni elandelayo limxelela ngokudlwengulwa kwalo. Kamva kwaxelelwa uyise wakhe ngaphambi kokusiwa eThuthuzela Care Centre ukuyohlolwa nguGqirha. Ingxelo kaGqirha efundwe njengobungqina enkundleni idize umonzakalo kwixhoba nemikrwelo emzimbeni.
Kukho ingxelo engeniswe enkundleni edize ukuba ixhoba lifake incwadi yokurhoxisa ityala ngelithi emva kokuhamba inkonzo yentuthuzelo yomphefumlo libone kufanelekile ukuba limxolele uOvayo kwaye lingangcolisi ikamva lakhe. Kumaxwebhu enkundla akukho ngxelo iveze ukuba esi sibini sasithandana nangona umrhanelwa ebanga oko.
UOvayo uthe akazulivuma ityala atyatyekwa lona ngelithi babelana ngesondo ngesivumelwano. IGqwetha lomrhanelwa uAbongile Dumile uthe: “Ndifuna ummangalelwa akhululwe ngesilumkiso. Kungalibaziseka ukuxoxwa kwetyala,noluntu lufuna akhululwe ngebheyile.”
Inkokheli yabafundi uMihle Mkhunqwana uthe: “Sifuna uOvayo aphume axoxe engaphandle,aphinde ayobhala iimviwo zakhe.Ixhoba lalisoloko lincokola nomrhanelwa emnxebeni ngaphambi kwalo mhla.” UOvayo Ndaku ukhululwe ngebheyile ye-R1000.00 ityala limiselwe umhla we-20 Oktobha walo nyaka.
