Kuthinjwe isigidi semali yokubolekisa ngokungekho mthethweni 

Intatheli: Monwabisi Khininda|Ngqeleni

Icandelo lesipolisa eliphantsi kooKhetshe iSpecialised Investigation isebenzisana neAsset Forfritute Unit phantsi keNational Prosecuting Authority ifumene igunya lokuthimba imali ekuma-R1.3 esigidi. Othethela ooKhetshe (Hawks) uWarrant Officer Ndiphiwe Mhlakuvana ungqinile ukuba inkundla ephakamileyo yaseMthatha ikhuphe esi sigunyaziso ngomhla we-19 kuSeptemba walonyaka.

“Ngomhla we-25 kuJanuwari walonyaka amalungu ka-POP (Public Order Policing alunywa indlebe ngemipu engekho mthethweni ekuNomadolo eNgqeleni. Kologqogqo kwafunyanwa imali imali esemigqomeni ekuma-R1,395,209.30 nezinye izinto ekuqikelelwa ukuba zinxulumene nokubolekisa kwemali okungekho mthethweni,”kucacisa uMhlakuvana. Kuphinde kwafunyanwa namakhadi akwa-SASSA ayi-57 nawakwa-Easy Pay, namakhadi ezazisi ayi-13, nezazisi eziyi-33, amakhadi abhanki ezahlukeneyo ayi-32. UMhlakuvana udize ukuba uSiphetho Ntaka kwafikwa ekulendlu waze wabanjwa ngamapolisa ngokuqhuba ishishini lokubolekisa ngemali elingabhaliswanga ngokusemthethweni nokufunyanwa enompu ongekho semthethweni neembumbulu.

“Umsolwa uvumile ukuba ngenene uqhuba ishishini lokubolekisa ngemali elingekho mthethweni esebenzisa izazisi namakhadi ababokeki-mali. Uphinde wavuma ukuba nompu ofunyenweyo ngowakhe nangona ililahle.”Kuphinde kwaphawuleka ukuba uphando olwenziwe yi-Asset Forfeiture Investigation lungqinile ukuba umsolwa uqhuba ishishini elingabhaliswanga yaze iNkundla ephakamileyo yakhupha isigunyaziso sokuba ithinjwe imali ngomhla we-19 kuSeptemba walonyaka. UMhlakuvana uphinde wadiza ukuba uNtaka ugwetywe iminyaka emihlanu eye yaxhonywa isithuba seminyaka emihlanu.