Lidinga inkxaso iziko lobugcisa eMthatha 

Intatheli: Monwabisi Khininda|Mthatha

Usekela Mphathiswa wesebe leZemidlalo uBugcisa neNkcubeko uPeace Mabe undwendwele eMthatha ngenjongo zokujonga iziseko zeMthatha Community Art Centre, nekuyindawo yobugcisa neyeyokuqala ukusungulwa kwiphondo leMpuma Kapa. Eli ziko ligqiba iminyaka engamashumi amathathu lasekwayo lizinze kwa-61 First Avenue eNorwood eMthatha.

Eli ziko lobugcisa lisebenza ngokupheleleyo, likhokelwa sisigqeba esikhethiweyo,nesithembakeleyo ukuqinisekisa ukuba lisebenza yonke imihla ngokuphangaleleyo. Lelinye lamaziko axhaswa liSebe leZemidlalo uBugcisa neNkcubeko.

Usekela Mphathiswa ebezomamela izikhalo zamagcisa nezinto ezifuna ukulungiswa kweli ziko.Usekela Mphathiswa uthe urhulumente uzakuqinisekisa ukuba eli ziko lifumana inkxaso epheleleyo. Eli ziko livelise abadlali beqonga nomabonakude abafana noJet Novuka osele ezenzele igama kwimidlalo kamabonakude.