Itumente entsha kraca yabeneminyaka engaphantsi kweshumi elinesithandathu U/16, iNozulu Youth Legacy Cup, iphunyelelwe liqela laseGcuwa, iFC Tshabalala emva kokuba amaqela ebephuma eMthatha, Mdantsane nase Aliwal North ehlulakele.
Sports

Iyaphuculwa ibhola eMnquma

3 years Dizindaba 202 Views

Itumente entsha kraca yabeneminyaka engaphantsi kweshumi elinesithandathu U/16, iNozulu Youth Legacy Cup, iphunyelelwe liqela laseGcuwa, iFC Tshabalala emva kokuba amaqela ebephuma eMthatha, Mdantsane nase Aliwal North ehlulakele.  Ngamaqela alishumi elinesithandathu (16) abekhuphisana kule tumente ibibanjelwe kwibala laseMsobomvu ngempelaveki.

Kumaqela asibhozo afikelele kumjikelo olandelayo wetumente abesixhenxe awaseMnquma. Onke lomaqela aye athiwa jize ngeekiti ezintsha kraca zokudlala ngabaxhasa betumente ngenxa yokuba efikelele kumjikelo olandelayo wokhuphiswano.

Iqela laseGcuwa, FC Tshabalala ne-Early Birds FC yaseMdantsane ngawo akwazileyo ukufikelela kumdlalo wamagqibela kankqoyi.  FC Tshabalala eqeqeshwa nguSimpiwe Siyongwana iye yaphumelela lomdlalo wamanqam ngamagowuli amabini eqandeni 2-0.

Ngokuphumelela kwayo iphinde yanikwa enye kiti entsha kraca, imali engange R5000, indebe enkulu, iimbhasa zegolide neezixhobo zokuqiqeqesha.

Ngokubethwa kwalo iqela laseMdantsane Early Birds FC, ifumene ikiti entsha kraca, imali engange R2500, indebe yesilivere, imbhasa zesilivere neezixhobo zokuziqeqesha.  Wonke amaqela abethathe inxaxheba kule tumente afumene izixhobo zokuziqeqesha neebhola kwaye kunyaka ozayo izakuphinda idlalwe iNozulu Youth Legacy Cup.

Ngexesha bekuqhuba lemidlalo bekukho nabakwaSuperSport ukuqinisekisa ukuba wonke ubani uzakuyibona kumabonakude. Umbutho webhola eGcuwa, Mnquma local football association, Mnquma LFA ubulele kakhulu kwinzalelwane yaseGcuwa uLuxolo Matikinca ongumsunguli wale midlalo kulindeleke iqhube iminyaka emihlanu elandelayo ngenjongo zokuphuhlisa abantwana kwibhola ekhatywayo.