IsiXeko silumkisa abahlali ngabarhwebi abathembisa ngamathuba emisebenzi

29 June 2023 – Dizindaba Reporter

EKapa

IsiXeko saseKapa siye safumana isilumkiso sokuba amaqhophololo athile ngoku athatha imali ukuze afumane isithembiso somsebenzi kwisiXeko. ICandelo leeNkonzo eziManyanisiweyo leSixeko lingathanda ukucebisa uluntu ukuba aluhlawulisi izicelo zomsebenzi phantsi kwazo naziphi na iimeko kwaye onke amathuba emisebenzi nawoqeqesho apapashwa ngemijelo esemthethweni yesixeko kuphela.

‘Sithanda ukukhumbuza abahlali kwakhona ukuba isiXeko asibizi mali ngezicelo. Sivelana nabo bantu baye baba ngamaxhoba aba urhwaphilizo kwaye sicela ukuba uluntu lusoloko lusebenzisa amajelo onxibelelwano kwizibhengezo zemisebenzi xa befaka izicelo zamathuba. Zonke izithuba zemisebenzi kunye neenkqubo zoqeqesho zipapashwa ngokubhaliweyo ngoko ke abahlali akufuneki bamkele naziphi na izinto ezithenjiswa ngomlomo,’ latsho iLungu leKomiti kaSodolophu weSixeko kwiiNkonzo eziManyanisiweyo, uAlderman Theresa Uys.

Isebe leMicimbi yaBasebenzi leSixeko lilandela inkqubo yokugaya njengoko kuchaziwe ngezantsi:

• ISixeko saseKapa sibeka iintengiso ngaphakathi kunye/okanye ngaphandle ngokuxhomekeke kubume besithuba eso. Kubenzi-zicelo bangaphandle, iintengiso zifakwa kumaphephandaba afanelekileyo, kwiwebhusayithi yeSixeko kwicandelo lemisebenzi, nakwamanye amaphepha emisebenzi afana ne-LinkedIn.
• Iintengiso zangaphakathi zihanjiswa ngekhompyutha kusetyenziswa iSAP portal kunye nephepha lemisebenzi. Izibhengezo zikwabekwa kwiibhodi zezaziso ezichongiweyo kumaziko eSixeko.
• Ngokuxhomekeke kwinqanaba lesikhundla, abafaki-zicelo baya kucelwa ukuba bangenise izicelo zabo zemisebenzi kwi-intanethi nge-SAP portal yeSixeko, okanye bazidlulisele kwidilesi ye-imeyile yezithuba ezifanelekileyo.
• Amathuba enkqubo yoQeqesho noPhuhliso afana ne-Work Integrated Learning (WIL), uPhuhliso lweZakhono, iSibonelelo soPhuhliso lweZakhono ze-Infrastructure Skills (ISDG), kunye neNkqubo yeGraduate Internship (GIP), inokufikelelwa ngokusayina ku-https://jobjack.co. za. Abantu abanomdla baya kufuneka babhalise kwisiza kwaye baya kuba nokufikelela ukuze babhalisele ezi nkqubo.

Sibongoza abahlali ukuba bazixele izenzo zobuqhophololo kwiiNkonzo zamaPolisa oMzantsi Afrika ukuze bancede bagwetywe umenzi wobubi.