UCele unikezele ngeezithuthi ezine eBhityi

07 EyoMsintsi 2023 – Monwabisi Khininda

EBHITYI

UBheki Cele onguMphathiswa wesebe leZamapolisa usizalisekisile isithembiso sokuzama ngandlela zonke ukulwa ulwaphulo mthetho eBhityi.NgoLweisthathu weveki esisuka kuyo uCele unikezele ngeeveni ezine kwesi sikhululo. Olu nikezelo ibiyinxalenye yeMbizo yeNkulumbuso uOscar Mabuyane mbizo leyo ibibanjelwe eMqhekezweni neyenye yeelali ezigutyungelwe lulwaphulo mthetho.

Ezi zithuthi zine zazicelwe ziiNkosi ukuba angenelele uMphathiswa xa umasitishi ekhala ngokungabinazithuthi zaneleyo ukulwa ulwaphulo mthetho. UCele unikezele ngezithuthi ezine kwezo zihlanu zaziceliwe, watsho esithi isithuthi sesihlanu sizakuphinda siziswe. UMphathiswa Cele ebephelekwe nguMkomishinala uGeneral Fanie Masemola nezinye izikhakhamela kwinkonzo yesipolisa eziquka uLuitenant-General Tebello Mosikili noMkomishinala ephondweni uLuitenant-General Nomthetheli Mene.

UMphathiswa uCele uqinisekisile ukuba isikhululo samapolisa saseBhityi sizawukokhiwa ngokutsha ze sonyuselwe kwinqanaba lobuKoloneli. INkulumbuso uMabuyane uthe kuzawufakwa isibane eside ngethemba lokuthibaza ulwaphulo mthetho olugabadeleyo kule ngingqi. Kwelokuqwela uMphathiswa uCele uthe isebe lakhe libekele bucala isixa mali esikwi R6.5 yezigidi kwiphulo lokulwa ulwaphulo mthetho eMpuma Kapa.Le mali izakusetyenziswa ukuphucula i.CPF (Community Policing Forum).