Kuthinjwe inyanda yemihlohlwa eLusikisiki

07 EyoMsintsi 2023 – Monwabisi Khininda

ELUSIKISIKI

Limiselwe uLwesithathu weveki ezayo yinkundla yayamatyala yaseMthontsasa eLusikisiki ityala lendoda ebanjwe nemipu engumazenzele elishumi elinanye. UMthandeni Goodman Somzana (47) ebevele enkundleni yamatyala yaseMthontsasa ngoLwesihlanu weveki ephelileyo, ejamelene nezityholo zokufunyanwa nemipu eyimihlohlwa (oomazenzele) neembumbulu eziliqela.

Umrhanelwa ubanjwe kugqogqo lwamapolisa kwintseni yangoLwesithathu.Kuvakala ukuba kwisithuba sika-4.30 ngoqhiza amapolisa ecandelo elaziwa ngokuba VISPOL nabaphandi bebelandela iinkcukacha zesiganeko sokuxhonyiswa esikolweni ebutsheni beveki, ngethuba begqonqa emzini othile kwilali iMhlwazi ephantsi kweUpper Hlabathi.

Ingxelo idize ukuba kolu gqogqo abakwantsasana bafumene ipads ezilishumi elinesithandathu ebezibiwe esikolweni ebutsheni beveki.Ingxelo ekhutshwe sisithethi samapolisa ephondweni uCol.Priscilla Naidu udize ukuba ngethuba kuqhutywa ugqogqo lokukhangela umrhanelwa kulo mmandla, kufunyenwe oomazenzele bemipu kwi-wardrobe. Ukanti ngethuba kugqogqwa ngaphandle nangaphakathi,kufunyenwe imipu esixhenxe kwisithuthi esiluhlobo lwe-Mercedes Benz.

Kuphindwe kwafunyanwa iimbumbulu eziyi-45 kunye nompu oyi-9 mm nombayimbayi. UMkomishinala wamapolisa ephondweni uLt.Gen Nomthetheli Mene uqhwabele izandla amapolisa ngokufunyanwa kwezi zixhobo, etsho esithi akuthintelanga nje ukonzakaliswa kwabanye abantu ngayo kodwa kubonakalisa indima yamapolisa ukusiphula neengcambu imipu engekho mthethweni.