Bakhalazile abahlali ngezindlu zangasese
28 EyoMsintsi 2023 – Anele Raziya
NGQUSHWA
Abahlali belali yakwaMachibi kwaWadi 4 eNgqushwa banike umasipala wabo nomasipala waseAmathole uxanduva lokuba baqwalasele ungagqityezelwa ukwakhiwa kwezindlu zangasese kwindawo yabo, intswela ngqesho ekuhlaleni, ungabikho kombane kwindawo ezithile ekuhlaleni nokunqongophala kwamanzi.
Abahlali bakuveze oku ngexesha usodolophu waseNgqushwa uSanga Maneli ekunye nogxa wakhe usodolophu waseAmathole, uAnele Ntsangani bebetyelele kwaWadi 4 kwilali yaseMachibi kwiveki ephelileyo.
Utyelelo lwabo beli malunga nokumamela imiceli mngene ejongene nabahlali kwaye nabo banike umkhomba ndlela nendlela ekuzakusonjululwa ngayo ezo ngxaki.
Ngexesha bedibene nabahlali oosodolophu bobabini baye bachazele abahlali ngenkonzo ezihanjiswa ngoomasipala babo kwaye bacacisa nange Arhente abasebenzisana nazo ukuqinisekisa ukuba iinkonzo zikarhulumente ziyafikelela kuluntu.
Usodolophu waseAmathole uNtsangani obekhatshwe ziinjineli uye waxelela abahlali ukuba bayesebenzisana ne Arhente iAmatola Water ukhangela isisombululo songaphumi kwamanzi kwiindawo ezithile eNgqushwa.
Uthe ingxaki yokungaphumi kwamanzi yenze ukuba baqeshe umcebisi (consultant) owenza uvavanyo lwemibhobho ehambisa amanzi ujonga unobangela wokungafikeleli kwamanzi ezitephini kwindawo ezininzi zaseNgqushwa.
Njengokuba kuqeshwe lomcebisi kulindeleke ukuba kuvuleke namathuba weemisebenzi njengoko inkampani yakhe iza kudinga abantu ezakwenza nabo lomsebenzi.
Kumba weezindlu zangasese ezashiywa phakathi ukwenziwa, uNtsangani uthe eso sikhalo bazakusinika igqwalasela bengumasipala kwaye baqinisekise ukuba sibekwe phambili kuluhlu lweenkonzo ekufuneka bezihambisile eNgqushwa.
USodolophu waseNgqushwa uSanga Maneli uthe kuza kugqityezelwa ukufakelwa umbane kwezo ndawo zathi zayekwa phakathi.
Uthe abo bajonge amathuba wengqesho ubacebisa bahlale bejonga nakumaphepha kuba imisebenzo ipapashwa khona amaxesha amaninzi.
Uqhube wathi baceba nokunika ooceba babo izithuba zemisebenzi ukuba bazixhome ezilalini zabo ukuze wonke ubani afumane ithuba lokubona khonukuze afake isicelo sakhe somsebenzi.
Waleke ngelithi ilali nelali iye ilifumane ithuba lokuqeshwa kwabantu bayo kwimisebenzi yethutyana yamaphulo karhulumente efana neenkqubo ye EPWP ne CWP nenjongo zayo ikugxotha ikati elele eziko.
Abahlali baseMachibini baye bayibulela ichazelo abayifumene koosodolophu babo kwaye banethemba lokuba imiceli mngene abajongene nayo yeenkonzo zikarhulumente izakuhoywa emva kokuba bethethe nezinkokheli zaseburhulumenteni.
