Ukhululwe uNkosi Mandela obexhwilwe ngamajoni akwaSirayeli

Intatheli: Monwabisi Khininda|Mzansi Afrika

UNkosi Zwelivelile Mandla Mandela oyiNkosi yakuMvezo eMthatha nokwalilungu lepalamente ukhululwe emva kokuxhwilwa ngamajoni akwaSirayeli. Oku kulandela uhambo lwakhe neqela lamatshantliziyo eGlobal Sumud Flotilla kwakunye neentatheli besingise eGaza nalapho bebeyonikezela ngeempahla, iingubo nokutya kumaxhoba ocalucalulo olugquba phakathi kwabakwaSirayeli nabasePalestina.

Bebekwazama nokunqanda ukuthathwa komhlaba waseGaza ngabakwaSirayeli. Emva kongenelelo lorhulumente woMzantsi Afrika nentlokomo eye yadalwa ziinkokheli zamazwe ngamazwe bakhululwe kwaye uNkosi Mandla Mandela ongumzukulwana kaRholihlahla Nelson Mandela uthi akazisoli ngenyathelo lakhe lokuzibandakanya neqela lamatshantshiziyo anyanzelisa ukuphela kohlaselo lukaSirayeli eGaza yamaPalestina.

UNkosi Zwelivelile uthi ebeyiqonda into yokuba oluhambo alizubalula. “Ndazibona ndikhulekwe ngeentsontela izandla zibotshwe ngemva; ndikhonjwe ngombayimbayi ingathi kubanjwe umnqolobi. Sazibona singamaxhoba orhulumente, olufana nolwe-Apertheid,oluqhutywa ngurhulumente wakwaSirayeli ngakumaPalestina. Urhulumente wakwaSirayeli uthe gqolo ukuhlasela amazwe angoIran, Lebanon, Syria, Yemen neQatar kungekho bani umohlwayayo.