Lumkela ubuqhophololo bemisebenzi ye-EPWP
31 EyeDwarha 2023 – Intatheli kaDizindaba
KAPA
IsiXeko saseKapa kutsha nje siye safumana ulwazi ngobuqhophololo obutsha be-EPWP, obujikeleza kuWhatsapp (jonga umfanekiso ongezantsi), obubhekiselele ekugayweni kwabantu abaninzi kwi-EPWP ngo-2023. ithuba lomsebenzi kunye nesibonelelo senyanga phakathi kwe-R7 000 kunye ne-R20 000.
ICandelo loLawulo lweNkunkuma yeDolophu yeSixeko liyayiqonda into yokuba eli khonkco liye lavalwa, nangona kunjalo ngenxa yokuba abanye abantu abafuna umsebenzi basengamaxhoba amaqhinga afanayo, singathanda ukukhumbuza abahlali ngendlela yokwahlula ithuba lokwenyani lomsebenzi kulowo womgunyathi.
Nazi ezinye iimpawu eziqhelekileyo ezibonisa ukuba umsebenzi bubuqhophololo:
- Umqeshi uqhagamshelana nawe
- Ufumana umsebenzi ngoko nangoko
- Umvuzo uphezulu ngendlela ekrokrisayo
- Iimfuno zomsebenzi kunye nenkcazo ayicacanga
- Inkampani ifuna intlawulo kuwe ukuze ube nokuqwalaselwa
- Umsebenzi uthembisa ukuba uya kuba sisityebi ngokukhawuleza
- Unxibelelwano lubonakala lungasebenzi kakuhle (iimpazamo zopelo/zegrama)
- Iinkcukacha zoqhagamshelwano zomqeshi okanye inkampani zilahlekile
- Inkampani icela ulwazi oluyimfihlo phambi kokuba iqeshe
‘Sibongoza abo bafuna umsebenzi ukuba balumke ngakumbi. Kubaluleke kakhulu ukuqaphela ukuba isiXeko asinakuze sicele uluntu ukuba luhlawulele amathuba emisebenzi, okanye luhlawule ukuze lufake isicelo somsebenzi,’ litshilo iLungu leKomiti kaSodolophu kuLawulo lweNkunkuma yeDolophu, uAlderman Grant Twigg.
Ubhalisela njani amathuba emisebenzi kwi-EPWP
Ukuba ungathanda ukuqwalaselwa ngamathuba omsebenzi we-EPWP, ekuphela kwendlela yokwenza oku kukubhalisa kuVimba weeNkcukacha zabaFundi beMisebenzi kwi-ofisi yebhungana lengingqi yakho.
Nceda uze nekopi yeCV yakho, isazisi sakho okanye iphepha-mvume lokusebenza elisemthethweni laseMzantsi Afrika. Abaxhamli be-EPWP bakhethwa ngokungacwangciswanga kolu vimba weenkcukacha.
Ngolwazi oluthe vetshe, qhagamshelana neDesika yoNcedo ye-EPWP kule nombolo 021 400 9406 okanye uthumele i-imeyile epwp.help@capetown.gov.za. (07:30 de 15:30).
