Amapolisa aphanda ngezityholo zentuthumbo kumapolisa eCCTV

U-Juma Igiranieza wabethwa ngomhla wesi-7 kuNovemba ngamapolisa awayegqogqa kwindawo yakhe yokusebenza

• Umchebi weenwele waseKapa owahlaselwa ngokungenalusini ngamapolisa ngomhla wesi-7 kuNovemba uzakuba namangalela urhulumente ngomonakalo.
• UJuma Igiranieza, osuka eBurundi, wabethwa ngamapolisa ngexesha logqogqo ebengalindelekanga kwindawo asebenza kuyo, isaluni eMowbray, eKapa. Uhlaselo lubanjwe kwiCCTV yesalon.
• Kule veki, i-Independent Police Investigative Directorate (IPID) iqinisekise kwiGroundUp ukuba amapolisa afunyenwe ebandakanyeka kuhlaselo anokujongana nezityholo zokuzama ukubulala, ukungcungcuthekisa nokubetha ngeenjongo zokwenzakalisa umzimba kabuhlungu (GBH).

Amagqwetha amele umchebi weenwele waseMowbray ohlaselwe ngamapolisa ekuqaleni kwale nyanga akhuphe isaziso kumkomishinala wamapolisa kuzwelonke nakwiNtshona Koloni ngeenjongo zakhe zokubanga iintlawulo.

Oku kuvele ngethuba i-Independent Police Investigative Directorate (IPID) iqinisekisa kwiGroundUp ukuba la mapolisa afunyaniswe ebandakanyeka kuhlaselo angajongana nezityholo zokuzama ukubulala, ukungcungcuthekisa nokubetha ngeenjongo zokwenzakalisa umzimba kabuhlungu (GBH).

U-Juma Igiranieza wabethwa ngomhla wesi-7 kuNovemba ngamagosa asebupoliseni ngethuba logqogqo ebengalindelekanga kwindawo yakhe yokusebenza, iPerfect Touch Boutique kunye neSalon eMowbray, eKapa.

I-GroundUp ipapashe umfanekiso weCCTV ngomhla we-10 kuNovemba obonisa amapolisa amaninzi, omnye enxibe nje, esenza uhlaselo. Kwimifanekiso eshukumayo, ubuncinci amagosa amabini athatha inxaxheba ngokuthe ngqo kuhlaselo kwaye akukho nalinye ipolisa elibonakala lixhalabile luhlaselo. Bakhulula uIgiranieza ngamanqindi, bambetha ngokuphindaphindiweyo ngesixhobo somthi, baze bambethe ngeplastiki.

Kuthiwa la magosa ayekhangela umphathi kaIgiranieza awayemtyhola ngokuthengisa iziyobisi. UIgiranieza wasiwa kwisibhedlele iGroote Schuur ukuze afumane unyango emva kohlaselo.

NgoLwesithathu uRussel Manuel, igqwetha elisebenzisana noLionel Murray Schwormstedt & Louw uthe umxhasi wakhe, uIgiranieza, ubanga umonakalo phantsi kweInstitution of Legal Proceeding against Some Organis of State Act 40 ka-2002. Umkomishinala wephondo, utshilo.

“Ekuphumeni kwezaziso zenjongo yomthengi wethu yokuqalisa inkqubo, baneentsuku ezingama-60 zokwamkela okanye ukulandula (ukwala) ibango, okanye akukho nto banokuyenza. Xa ziphela ezi ntsuku zingamashumi amathandathu siyalelwa ukuba sikhuphe isamani [yamatyala embambano],” utshilo uManuel.

Isithethi se-IPID uRobbie Raburabu ungqinile ukuba ngaphezu kokubetha uIgiranieza, abaphandi bakwajonge kwizityholo zokuba la mapolisa abethe omnye umntu ngaphandle kwendawo yokulungisa iisaluni kunye newashi-moto ekufutshane.

“Esi siganeko saxelwa kwi-IPID ngomhla we-9 kweyeNkanga ngo-2023 ze i-IPID yaluthathela kuyo uphando. Izityholo eziphandwayo zelokuzama ukubulala, ukungcungcuthekisa, ukubetha ngenjongo yokonzakalisa. Onke amaxhoba ngabantu basemzini.”

Ebuzwa ukuba ingaba amapolisa abandakanyekayo kuhlaselo navela kwividiyo yeCCTV sele echongiwe, kwaye zithini iziphumo abanokuthi bajongane nazo, uRaburabu uthe: “Uphando ngokuqinisekileyo luza kuwachonga onke amalungu abandakanyekayo. Lwakuba luqoshelisiwe uphando, iingcebiso ziya kuthunyelwa kuGunyaziwe woTshutshiso weSizwe ukuze athathe isigqibo kunye ne-SAPS ukuba ithathelwe amanyathelo oluleko.”

Umnini wePerfect Touch Boutique kunye neSalon, ocele ukuba igama lakhe lingachazwa, uthe yena noIgiranieza basebenzisana ngokusondeleyo noManuel. Uthe amagosa amane ogcino-mthetho afikile kwishishini lakhe lesibini, emva kwesaluni, nge-15 kaNovemba.

“Ngethamsanqa bakufika ngaloo mini, ndandikwisaluni. Ndithe ndakuva ukuba bakwi car wash ndaya kubo. Ndibabuze ukuba ndingabanceda njani, bandibalisela ibali elifanayo ngabantu abathengisa iziyobisi kwindawo yam,” utshilo.

“Ndibaxelele ukuba bayabazi aba bantu mabababambe, kungenjalo kufuneka bahambe. Abakhange bagqogqe. Emva kwaloo mini, akukho mntu ubuyileyo,” utshilo umnini.