Amanina agrogrisa ngokuthandazela isidlwengu

Monwabisi Khininda – 25 kuTshazimpuzi 2024

Isikhokhelo senkqubo yeNkciyo eMpuma Kapa sigrogrisa ngokumfundisa isifundo xa engakhutshwa ngebeheyile yinkundla otyholwa ngokudlwengula intombi yeNkciyo kwilali yaseNcise eMthatha. Umrhanelwa uMasande Lusanda Manyifolo (44) uvele enkundleni yamatyala eMthatha kwiveki ephelileyo eyofaka isicelo sebheyile.

Usagcinwe eluvalelweni kusukela wabanjwa ngoNovemba kunyaka ophelileyo. Eli tyala lithe lamiswa ngenxa yegqwetha lakhe ebelingekho enkundleni. UManyifolo ungummelwane kwixhoba elineshumi nesihlanu ubudala kulelali.Kuvakala ukuba wacela ixhoba kumakhulu walo ngenjongo zokulithuma isiselo kwivenkile ekufuphi. Lakubuya nesiselo waliyalela liyingenise endlini, walilandela walivalela waze wanyusa umculo walifuthanisela ngomqamelo wazithathela kumhlaba ongezantsi.

Umququzeleli weNkciyo ephondweni uKhuthala Mditshane uthi bayavuya esagcinwe ngaphakathi kodwa xa engakhutshwa bangambeka izandla bamthandazele. “Ukugcinwa komrhanelwa sisifundo nakwabanye. Kulihlazo ukudlwengulwa kwabantwana ngamadoda ekumele ukuba ayabakhusela. Sifuna angayinikwa ibheyile, siyafa ngumsindo,” kutsho uMditshane. Inkokheli yeNkciyo eNcise uNomxolisi Ludidi uthe:“ Sixakwe zizidlwengu zamadoda axakileyo.Into esixakileyo usapho lukaManyifolo zange luze nakanye kusapho lwexhoba,loo nto isibonisa ukuba baxhasa umrhanelwa.”

Eli tyala kulindeleke libuyele enkundleni ngomhla we-26 kuTshazimpuzi walo nyaka. Ngalo mhla kuzowiswa isigwebo kwisicelo sebheyile.