Isidlwengu sigwetywe ubomi izihlandlo ezibini 

26 EyoMsintsi (Sept) 2024 – 09 EyeDwarha (Oct) 2024

Monwabisi Khininda

INkundla yeNgingqi yaseMthatha ithe nkaa ngesigwebo sobomi izihlandlo ezibini isidlwengu esiphindaphindayo uGugu Honono. Esi sidlwengu sifunyenwe sinetyala kwizityholo ezithathu zokudlwengula nokuphanga. Onke la matyala uHonono wawenza kumnyaka wama-2012.

IGunyabantu leZotshutshiso kuZwelonke (NPA) lithe incindi yofuzo (DNA) yiyo encedise ekubanjweni kukaHonono obefunwa ithuba leminyaka esibhozo. “Lo mrhanelwa waye wabanjelwa ukweba evenkileni kuKomani ngo-2022. Watsho woyanyaniswa namatyala okudlwengula awawenza kuQumbu,”kucacisa uLuxolo Tyali osisithethi seNPA eMpuma Kapa. UTyali uthi ikhompyutha yamapolisa yakwazi ukoyamanisa uHonono namatyala awawenza kuQumbu.

Ngokwamaxwebhu ezotshutshiso uHonono waqala ngokudlwengula intombazana eneminyaka eyi-12 ngoDisemba ka-2012. Wamane enkqonkqozela amantombazana agxamesayo eShawbury ewadlwengula. Omnye wamangqina nokwalixhoba likaHonono walile ukunika ubungqina enkundleni ngelithi akafuni kuvuselela isilonda ebesesipholile.Ngenxa yesosizathu uMtshutshisi uBulelani Bidla khange aqhubeleke nokumtshutshisa ngetyala lesithathu  lodlwengulo ummangalelwa

UBarry Madolo oNgumlawuli wecandelo lezotshutshiso eMpuma Kapa ubothulele umnqwazi uMtshutshisi nomcuphi wetyala ngokukwazi ukuqokelela ubungqina obuzawufumanisa ummangalelwa enetyala. “Ukugwetywa kukaHonono kuwaxolisile amaxhoba odlwengulo kwazisa ithemba lenkqubo yomthetho nakwiintsapho zamaxhoba,” kutsho uMadolo.