Kubulewe abaphangi ababini kuGaduka
10 EyeDwarha (Oct) 2024 – 23 EyeDwarha (Oct) 2024
Monwabisi Khininda
Amalungu e-NIU adubule abulala isibini esisolwa ngokuqokelela imali yokhuseleko (protection fee) kwilali yakuGaduka kwaNgcengane cebu kuhle kwidolophu yaseMthatha.Esi sibini sibhubhileyo siqikelelwa kwiminyaka engama 35. Amapolisa athe alunywa indlebe ngesibini esityholwa ngokuqokelela imali ebizwa ngeprotection fee kumashishini kulengingqi, asukumele phezulu amapolisa aleqa. Athe kanye xa engena elalini kuGaduka ayibona imoto yabarhanelwa eluhlobo lwe-VW Polo.
La mapolisa athe amisa imoto le yabarhanelwa, baphuma abarhanelwa baqalisa ukudubula amapolisa ka-NIU ,nawo awaphozisanga maseko amapolisa aphendule ngeyawo imipu bababeka phantsi ngoko nangoo.Akukho polisa lilimeleyo kulo mqhoqhozwano. “Oku kuthumela umyalezo osisilumkiso ukuba amapolisa ayalutshayela ulwaphulo mthetho,” kutsho uLt.General uNomthatheli Mene.
UMene uqhubeke wancoma amapolisa ngokudela ukufa aqondane ngqo nezaphuli mthetho ezixhobileyo, futhi aphume engalimalanga.Ityala lawuthi lidluliselwe kwi-Independent Police Investigation Directorate (IPID) ukwenza uphando.
