Lisiwa kwinkundla ephakamileyo elokubulawa kwamalungu e-CPF

January 21, 20251 year Dizindaba 303 Views

16 EyoMqungu 2025 – 29 EyoMqungu 2025

Intatheli kaDizindaba

Otyholwa ngokudubula abulale iqela labantu kuQumbu uthathe idabi lakhe lesicelo sebheyile walisa kwinkundla yamatyala ephakamileyo eMthatha. Kolu dubulo kwabhubha amadoda amathandathu awayengamalunga e-Community Police Forum ngethuba ehlaselwa kwisikolo iLugongozo kwilali iGodidi kuQumbu ngoOkthobha wonyaka ophelileyo.

Umrhanelwa uNdumiso Bongekile Nompehle-Macingwane (34) ubesoloko ezama ukufumana ibheyile kodwa ezo nzame ziwe phantsi. Ujongene namatyala amathandathu okubulala namanye.Wabanjwa ngomhla we-7 kuOkthoba kwiiyure nje emva kolugebengo.

Amaxhoba olugebengo aquka uSibonda welali yaseGodidi uAkhona Sotshongaye (40), uyise uDavid Mbabaza (65), uAmos Sombaba (71), David Marholi (52), Aphelele Mbali (27) noFezekile Mhlekwa (57). Emva kokukhatywa kwesicelo sebheyile yinkundla uMacingwane uthe uzofaka isibheno kwinkundla yamatyala ephakamileyo eMthatha. Eli tyala limiselwe umhla we-14 Febuwari 2025.