Kubanjwe abaphangi eMthatha West

30 EyoMqungu (Jan) 2025 – 12 EyoMbumba (Feb) 2025

Intatheli: Monwabisi Khininda

Icandelo lamapolisa elibizwa iTactical Reaction Team eMthatha libambe abarhanelwa abane abaphakathi kweminyaka engamashumi amathathu ukuya kumashumi amane ubudala ngokuphanga ishishini eSlovo Park kwiNtshona yoMthatha emini emaqanda ngoLwesithathu weveki ephelileyo.

Ngethuba kunqakulwa abarhanelwa amapolisa abambe nesithuthi kwindlela u-R61 kufutshane negaraji engasebenziyo eyakwaSasol ekuvakala ukuba sisetyenziselwa ukubaleka kwindawo yexhwayelo. Kubo kufunyenwe neempahla ekukrokrelwa ukuba zezobusela.Isithethi samapolisa kummandla waseMthatha uCapatain Welile Matyolo uthi phakathi kwezinto ezithinjwe ngamapolisa kwaba nqalintloko ziquka iintlobo zecuba eliyimidiza eliyi-Dunhill, 777, Ceaser Gold, Peter Styversant elingaxabisa i-R15000.00, umpu ongekho mthethweni kwibhegi encinane kodwa akukho mrhanelwa uvelileyo ebanga ngelithi ngowakhe lo mpu obukhuhlwe inombolo zawo.Bobane abarhanelwa kulindeleke bavele enkundleni yamatyala eMthatha ngoLwesihlanu kuleveki ngezityholo zokuphanga ishishini nokufunyanwa nompu ongekho mthethweni neembumbulu.

UMkomishinala wamapolisa kwisithili se-O.R Tambo uMajor General Norman Modishana uqhwabele izandla iqela lesipolisa kwisithili ngokuzimisela lisiphula neengcambu ulwaphulo mthetho.