Abakwa MultiChoice bazimisele ukuphuhlisa ezemidlalo ezikolweni

Ngu Anele Raziya 

Inkampani yakwaMultiChoice izimisele ukwenza ngako konke enako ukuba iphuhlisa imidlalo ezikolweni ingakumbi kwizikolo ezisemaphandleni. 

Kulandela emva kokuba iMultChoice iye yaxhasa izikolo ezilishumi eMnquma naseMbhashe ngeezixhobo zokudlala ibhola ekhatywayo, ibhola yomnyazi, ibhola yomboxo nangezinye izixhobo zokudlala eminye imidlalo.

Olu nikezelo lweezixhobo zokudlala imidlalo entlobo-ntlobo belubanjelwe kwisikolo samabanga aphakamileyo eGcuwa, iButterworth High School ngoLwesithathu weveki ephelileyo. 

Kwiminyaka emibini eyadlulayo iMultChoice yokha ibala lezemidlalo kwisikolo iButterworth high school ngenjongo zokucwagcisela ukuba izikolo zisungule ileague ezakudlalwa rhoqo ngoLwesithathu. 

USandile Luthuli ongumanejala kwicala elijongene nokuphuhliswa kwezemidlalo kule nkampani yakwa MultiChoice, uthe njengokuba baqala bokha ibala eGcuwa babone kufanelekile ukuba baphinde babuye bazokuxhasa izikolo zaseMnquma naseMbhashe ngeezixhobo zokudlala zemidlalo entlobo-ntlobo. 

ULuthuli uthe zizikolo ezilishumi abazikhethileyo ukuba zidibane zisungule ileague ezakudlalwa rhoqo phakathi evekini. 

“Njengokuba sokhe ibala eButterworth high school saye sagqiba kwelokuba izikolo ezikufutshane nebala kufuneka zidibane zisungule ileague ezakudlalwa rhoqo ngoLwesithathu,” kutsho uLuthuli. 

Uthe injongo zenyathelo labo kungokuba befuna uncedisana neezikolo kwicala lokuphuhlisa ezemidlalo kwaye banike abantwana ithuba lokuba baqaqambise iitalente zabo kwimidlalo eyahlukeneyo. 

Uqhube wathi eli phulo labo lokuncedisa ekuphuhliseni imidlalo baliqale ngokuqeqesha ootitshala abangamashu 50 ukuze balungele ukuqala imidlalo yeleague kwaye kungabikho kwanto esilelayo xa sele iqalile. 

Wongeze wathi ukuqala kwale league kuza kunika ithuba abantwana ukuba babonakalise iitalente zabo kwaye abanye babonwe babonwe nangamaqela amakhulu kweli. 

IMultiChoice ihlabe nekwelo lokuba ibala kufuneka liphathwe kakuhle kwaye ligcinwe licocekile ngalo lonke ixesha. 

Iqununu yesikolo samabanga aphantsi eGcuwa, Ibika primary school, uJongumzi Gushman uthe bayibulela kakhulu inkxaso abayifumene kwiMultChoice kwaye bayathembisa ukuba ibala bazakuliphatha ngendlela efanelekiyo. 

UGushman uthe ukuqala kwemidlalo kuza kuncedisa kwicala lokususa abantwana kwiziyobisi. 

Uthe ininzi into abayifundileyo malunga nokuququzelela ileague kwaye baqinisekile imidlalo iza kuqhuba kaluhle ngaphandle xa kifike ixesha lokuba iqale

Uvalelise ngelithi isikolo sakhe sele sikulungele udlala kwileagues. 

Izikolo ekulindeleke ukuba zibeyinxalenye yeleague zilishumi kwaye imidlalo kulindeleke iqale kwinyanga ezayo. 

MultiChoice uthe uzakuqhubeka nokuxhasa izikolo emidlalweni ingakumbi ezo zisemaphandleni nezibonakalal.