Angaphandle ngebheyile amapolisa angamatutu
NgoLwesihlanu weveki ephelileyo amapolisa amabini aseRhafu (Graaff Reinet) uWarrant Officer Johannes Gerber noWarrant Officer Lawrence Plaatjie bakhutshwe ngebheyile ye-R500 umntu emnye kwinkundla kaMantyi yaseRhafu.
La mapolisa ajongene nezityholo zokuba neminwe emide;babhaxekwa izityholo zokusebenzisa gwenxa impahla karhulumente. Emva kweveki amapolisa ecandelo leProvincial Anti-Corruption Unit ephanda athe abamba esi sibini asiphosa ngaphaya kwezimnyama izisele.
Ngethansanqa akwazile ukubuyisa impahla exabisa isigidi serandi (R1m). Le mpahla iquka amavili amatsha ezithuthi,izikhencezisi nejenereyitha. UMkomishinala wamapolisa kwiphondo leMpuma Kapa uLt. Col. Nomthetheli Mene uthe: “Asinayo indawo yamapolisa anobuqhophololo konke konke. Asiyisinekeli nakancinci into yokophulwa komthetho ngabantu abaqeshelwe ukugcina umthetho.” Aba nqalintloko bamapolisa bazakuvela enkundleni ngomhla wama-23 kweyoMdumba kulo nyaka.