UMongameli uye wabongoza ukuba kwenziwe iipads zasimahla
27 Isilimela (June) – 10 EyeKhala (July) 2024 – Intatheli: Mary-Anne Gontsana
Franschhoek
I_Menstruate Movement isungula umboniso “wexesha lobuhlwempu” eFranschhoek
Uphando olwenziwa kumantombazana kwizikolo ezili-18 kwilizwe lonke lufumanise ukuba ngaphezu kwe-80% awanandlela yokufikelela rhoqo kwii-sanitary towels. Oku kufunyanisiweyo kuthiwe thaca yi-I_Menstruate Movement ekusungulweni koMboniso wase-Exesheni ngobusuku bangoLwesihlanu.
Ingxelo yophando lwasekuhlaleni, “Ukopha ngokuzolileyo: Izithintelo kucoceko lokuya exesheni kumantombazana esikolo eMzantsi Afrika”, yapapashwa ngo-Okthobha wama-2023. Bamalunga nama-540 abafundi kwizikolo ezibini zamabanga aphakamileyo kwiphondo ngalinye kwalithoba abathathe inxaxheba.
Eyona njongo yalo mbutho kukuphelisa “intlupheko yexesha” eMzantsi Afrika.
Umseki we-I_Menstruate Movement uTracey Malawana uthe uMboniso we-Exesheni (eguqulelwe ngokukhululekileyo ngokuthi “elo xesha lenyanga”) ubalise amabali okuba sexesheni kwizizukulwana ezithathu kwaye ujonge ukuba ziye zavela njani na iimveliso zokuya exesheni. Omnye umfanekiso kamakhulu kaMalawana wagxininisa ukuba usebenzise “amagqabi namalaphu”.
Eminye imiboniso yayiquka iifoto zeepads zococeko kunye nephepha langasese elifakwe egazini. Bekukho nempahla yesikolo embalwa enamabala abomvu, nto leyo ebonisa umzabalazo ojongene nabanye abafundi ngaphandle kokufikelela kwiimveliso ezifanelekileyo zococeko.
UMalawana uthi olu phando lufumanise ukuba abafundi basebenzisa amadlavu, amakhadibhodi, itoilet paper kunye neekawusi.
UComfort Mokopanele ofunda kwisikolo samabanga aphakamileyo iTshireleco eKimberley, ongomnye wamagcisa kulo mboniso, uthe, “Uninzi lwethu alukwazi ukufikelela okanye alunamali ye sanitary pads, ezinye zezi zinto sizisebenzisa xa sisiya exesheni.”
UMalawana uthe inyathelo elilandelayo kweli phulo kukuphembelela uMongameli Cyril Ramaphosa ukuba enze ezinye iimveliso zokuya exesheni zifumaneke simahla.
“Iindleko zokuphila ziphezulu kakhulu kwaye iimveliso zokuya exesheni zibiza kakhulu. Abazali kunyanzeleke ukuba bakhethe phakathi kokuthenga isonka kunye neepads zangasese,” utshilo.
Umboniso wase-Exesheni uzakube useRhawutini kweyeThupha kwinyanga yamanina. Iya kusiwa kwiindawo ezimbalwa ezisemaphandleni ngo-Oktobha.