I Young Stars FC yaseMchubakazi eMnquma iphumelele INozulu Youth Legacy Cup

08 kuTshazimpuzi (Apr) 2024 – Anele Raziya

Owayesukuba ngumdlali weKaizer Chiefs, uWillard Katsande uncome umngangatho webhola obonakala uphezulu kwidolophu yaseGcuwa eMnquma.

Ukutsho oko ngexesha ebezimase imidlalo yendebe ebizwa iNozulu Youth Legacy Cup U/17 ebibanjelwe kwiYunivesithi iWalter Sisulu eGcuwa ngempelaveki.

Amaqela alishumi elinesithandathu (16) ebekhuphisana kwiNozulu Youth Legacy Cup uqala ngoLwesihlanu uyokuma ngeCawe.

IYoung Stars FC yaseMchubakazi eMnquma, iye yaphuma phambili kule tumente emva kokuba ibethe iCenter Of Excellence yaseMonti ngo3-0 kumdlalo wamagqibela kankqoyi.

Ukanti lamakhwenkwe aqeqeshwa nguNceba Madutswana abethe iintshantsheli ebezikhusela iFC Tshabalala yaseGcuwa ngo5-4 kwipenalthi ngaphambi kokuba afikelele kumdlalo wamanqam.

Lo gama iCenter Of Excellence yona ibethe iKZEE Youth Academy yaseThanga ngo5-4  kwipenalthi ngaphambi kokufikelela kumdlalo yokugqibela.

UKatsande uthe wonke amaqela ebethathe ixhanxeba kule tumente adlale kakuhle kwaye abadlali bebewuxhomile umngangatho.

“Italente ikhona kubadlali balapha kwaye ndinqwenela amaqela adlala kwipremier soccer league asondele kufutshane uzokujonga abadlali,” kutsho uKatsande ngexesha kusongwa itumente ngecawe.

Uthe abadlali bamaqela onke ebedlala kwiNozulu Youth Legacy Cup babonakala benaso isiphiwo sokudlala ibhola ekhatywayo kwaye bayazimisela xa bedlala.

Uqhube wathi uyanqwenela ukuba amaqela adlala kwiPSL angahambeli kude eGcuwa xa ekhangela abadlali kuba italente ininzi khona.

Uyisonge incoko yakhe ngokuthi xa eseRhawutini uza kuthetha ngeGcuwa ukuze amaqela azokhangela abadlali eMnquma.

Umqeqeshi weYoung Stars FC, uMadutswana uthe wonwabe kakhulu kukuphumelela kwabo iNozulu Youth Legacy Cup okokuqala ezimbalini.

“Sabethwa kabuhlungu kunyaka ophelileyo kule tumente saphuma ngaphambi komdlalo wamagqibela kankqoyi kodwa kweli ityeli besizixelele ukuba sizilungiselele kangangoko,” kutsho uMadutswana.

Uthe ubulela abadlali bakhe abaye badlala ngokuzimisela nokuzinikela ukuqinisekisa ukuba bayayiphumelela iNozulu Youth Legacy Cup ebesindlekwa okwesibini sukela oko yasungulwa kunyaka ophelileyo.

Ngokuphumelela le tumente baye bagoduka nemali engange R10 thousands ekhatshwa zizixhobo zokuziqeqesha (training equipment)

Lo gama iqela eliphume kwindawo yesibini, iCenter Of Excellence ligoduke neR5000 ekhatshwa zizixhobo zokuziqeqesha.

Onke amaqela afikelele kumjikelo waqela amane wokugqibela aye aphiwa iikiti kunye nezixohobo zokuziqeqesha.

Injongo zetumente iNozulu Youth Legacy Cup kuphuhlisa imidlalo eMnquma kwaye inikezele ngeezixhobo zokuqiqeqsha kumaqela ukuze aqhubele phambili ngebhola ekhatywayo.