UMphathiswa uNyhontso utyelele kuCentane 

12 EyoMsintsi (Sept) 2024 – 25 EyoMsintsi (Sept) 2024

Monwabisi Khininda

UKumkani Zwelibanzi Dalidyebo  wabaThembu uvuyisana nabahlali bakuCentane ngoMphathiswa woPhuhliso Lwelali neNguqu kweZomhlaba uMzwanele Nyhontso. Iindwendwe zamkelwe nguZwelibanzi ubuqu ezonwabisa ngoburharha namaqhula.Itheko ibilelokuvuyisana noMphathiswa uNyhontso nokwanguMongameli wombutho we-PAC.

Kwiindwendwe ezibekekileyo bekukho iKumkani yabaThembu baseRhode Dalimvula Matanzima, iNkosana uZolile Burns-Ncamashe, uVuyani Jarana owangumphathi wezoshishino kwaVodacom nakwaSAA, uZolani Mkhiva ongunobhala jikelele kwiContralesa, uSturu Pasiya weMthatha Bucks, uNqabayomzi Nkwankwa ongusekela sihlalo we-UDM,oosomashishini abafana noNogoduka neeNkosi zezizwe ngezizwe nezinye iinkokheli zaseMnquma.

UKumkani Dalidyebo uthethe wenjenje: “Bantwana abahle! Zikhona izinto ezifuna ukulungiswa. Siyaqala ngqa thina ukundwendwelwa nguMphathiswa wezemihlaba, siyaqala ngalo kaPoqo.Uqhube watsho uDalindyebo ekwavakalisa ukuba ulindele iinguqu nezinto ezinkulu kwimiba yembuyekezo yomhlaba wamaAfrika njengoba ulawulo lomhlaba lukhokhelwe lilungu lePAC ‘ekudala yakhala ngomhlaba’. Isithethi sosuku ibinguAdv. Thembeka Ngcukaitobi.Yena uthethe wenjenje: “Sinethemba kakhulu kutat’uNyhontso ngoba uphuma apha kwezilali zethu. Uyasazi isimo sentlalo yethu.”

UVuyo Flente owayakhe walikhansela elimele i-PAC, nentatheli yasekuhlaleni  uthe: “UMphathiswa ngumntu ekudala esilwela ukubuyiswa komhlaba nokulinywa kwamasimi kwaye naphaya epalamente usoloko ethetha ngokusiwa kwenkonzo eluntwini kwaye ufuna kukhuthazwe ukulima emakhaya.”

“Mna ndidinga uncedo lokukwazi ukubiyela amasimi wam angangeehekthare ezingama 200 ukuze ndikwazi ukulima amazambane namakhaphetshu kuwo,” kutsho uMthobeli Bhayinga waseLambasi, eLusikisiki.Ukanti uMphathiswa uNyhontso ngethuba esenza amazwi ombululo uye wathi uyivile iminqweno yabahlali kwaye uzimisele kakhulu ukusebenzela uMzantsi Afrika ukuze umhlaba ubuyele kubanikazi bawo.