Luyakhathazwa ulutsha kwezemidlalo ukulwa iziyobisi
29 June 2023 – Anele Raziya
EDutywa
Obesakuba yifolosi kwiqela iMatta Milan FC yaseDutywa, edlala kwiABC Motsepe league, uJulias “Juju” Jonga (28) uxhalabile yimeko yolutsha lakuCentane elibonakala lithe gabhu kwiziyobisi.
Intetha yakhe uJonga ilandela emveni kokuba esungule iqela lebhola ekhatywayo kuCentane ngenjongo zokususa ulutsha kwiziyobisi notywala.
Encokola neliphephandaba, uJuju uvakalise ukhathazeka yimeko yolutsha lakuCentane elokishini elibonakala lizinikezele kwiziyobisi luselula ngeeminyaka.
“Kubuhlungu ubona ulutsha lalapha kuCentane koovezinyawo (elokishini) lihleli ezikoneni lingenzi kwanto enokuqaqambisa ikamva lalo, endaweni yalonto luziyamanisa nezenzo zolwaphulomthetho neziyobisi,” kutsho uJuju odlalela iMusketeers FC yakuCentane nedlala kwiSAB Regional league.
UJuju ukwanguye nomphangele kwenye yevenkile zakwaSpar kuCentane kwaye ungumntu onothando kwezemidlalo ingakumbi kwibhola ekhatywayo.
EGcuwa ukhe wazenzela igama ngexesha ephumelela imbasa yokuba ngumdlali oqaqambileyo kwimidlalo yeNdebe kaSodolophu waseMnquma kwiminyaka edlulileyo.
Ukhe wanalo negalelo elicacileyo ngexesha edlalela iMatta Milan FC nalapho wayefaka amagowuli ukunceda iqela lakhe.
Kungokunje lomdlali weMusketeers FC uthe ubona kufanalekile ukuba asungule iqela lebhola ekhatywayo ngalenyanga yolutsha kuba efuna uncedisa ekuphuhliseni ezemidlalo ekuhlaleni kwaye asuse nabantu abatsha etywaleni.
Uqhube wathi bayakudinga ukuncediswa ngeezinto zokudlala ezifana neebhola kuquka nezinye izinto ezifana nekiti.
Okwangoku uthe basancedwa yiMusketeers FC ebabolekayo ibhola nezinye izixhobo zokudlala ukuba baziqeqeshe kuba nayo iyalixhasa iphupha lakhe lokunciphisa izinga lokusetyenziswa kweziyobisi lulutsha.
Uvalelise ngelithi bangakuvuyela ukufumana inkxaso yoluntu kwaye naye uzoqhubekeka eqokelela lonke ulutsha elihlala ezikoneni kuCentane alise ebaleni alifundise ibhola.
Ulutsha olungafundiyo uzimisele ulikhuthaza nalo ukuba libuyele esikolweni ukuze lizokuba nekamva eliqaqambileyo.
Ngeli phupha lakhe uJuju, ujonge nokuncedisa abadlali ukuba badlalele amaqela akwiABC Motsepe league, Motsepe Championship Divison nakwiDStv Premiership league.
