Kubhubhe ipolisa nonqevu kudubulwano eBhityi

13 EyeKhala 2023 – Monwabisi Khininda

EBHITYI

Kudutyulwe kwabulawa igosa lakwantsasana kwilali iNyibeni eBhityi eMthatha, kwiCawa edluleyo. Ukubulawa kwalo kushiye ukukhathazeka kwinkonzo yesipolisa yoMzantsi Afrika. Ngokwengxelo yamapolisa esi siganeko senzeke kwisithuba sentsimbi yesihlanu emalanga.

Amapolisa adize ukuba icandelo lamapolisa elithintela ulwaphulo mthetho belisabela kwisikhalazo eBhityi ngethuba libona isithuthi ebesikrokreleka bathatha isigqibo sokusimisa basigqogqe. Ngethuba amapolisa esenza ugqogqo abarhanelwa ababini benze owenkawu umtsi baphuma kuso bababeleka abasicatyana loo gama ababini bashiyeke bekunye namapolisa. Elinye ipolisa kuvakala ukuba liye labaleqa.

Ngethuba kuqhutywa olu gqogqo amapolisa ave izithonga zompu kwicala abebhekise ngakulo uConstable Asive Xolela Dudumayo (31) ngethuba eleqa abarhanelwa.  Ingxelo ekhutshwe sisithethi samapolisa ephondweni uBrigadier Thembinkosi Kinana udize ukuba ngethuba amapolisa esabela kwelocala afumene uConstable Dudumayo edutyulwe wonzakala, wabalekiswa kwisibhedlele esikufuphi ukuyofumana unyango. Ngelishwa usweleke xa efika esibhedlele eMthatha.

Kanti omnye umrhanelwa ufunyenwe ebhubhile ekwindawo engekho kude nalapho kufunyenwe khona uDudumayo.Unobangela woludubulo usaphandwa. Amapolisa avule ityala lokubulala, elokufunyanwa nemipu engekho mthethweni neembumbulu.

Omnye waba barhanelwa bane usagcwele amathafa logama ababini abaphakathi kweminyaka eyi-26 ukuya ku-38 kulindeleke bavele enkundleni yamatyala eBhityi kuleveki. UMkomishinala wamapolisa eMpuma Kapa uLueitenant General Nomthetheli Mene uqinisekise ukuba umrhanelwa osagcwele amathafa uzakubanjwa kungekudala.