OKhetshe banqakule bavalela amatutu aweba izigidi

13 EyeKhala 2023 – Monwabisi Khininda

KWABHACA

Ibutho loKhetshe (Hawks) khange linyube nenye kwezinyubisayo ngoMvulo linqakule lavalela amasela atye imali karhulumente ngobuqhwemesha. La matutu aneminwe emide kuvakala ukuba azabele ilifa kwimali yeempula zikalujaca begqebhelana ngayo nezizalwane zabo kwi-Ingwe TVET College ekwaBhaca. La masala angenasazela abhonule lekholeji imali ekwi R7.8 yezigidi.

Isithethi soKhetshe kwiphondo leMpuma Kapa uYolisa Mgolodela uthe: “Abarhanelwa babanjelwe ukwenza ubututu nobuqhophololo ngethuba besebenzela iziko leZemfundo i-Ingwe TVET College.Babeyalelwe ukuba babhatale ababoneleli ngeenkonzo (Service Providers) endaweni yoko bayifaka kwezabo iipokotho imali ebilungiselwe oko. ”Abarhanelwa ngaba balandelayo:-Nokwenjenje Matiwane (61), Mninawe Notshikila (35), Akhona Nkosazana Mveke (35) Asandiswa Wendy Mbebe-Mxali (44), Siyabulela Government Mxali (46), Balungile Godfrey Makaula (36), Zukiswa Nqina –Makaula (37), Asiphe Nombanga (62)  noNobantu Makaula (62).

NgoLwesibini abarhanelwa bebevele kwiNkundla kaMantyi (iMthatha Specialised Commercial Crimes Court) bebonke banikwe ibheyile yamawaka asixhenxe (R7000.00) umntu ngamnye.