Intlekele kabhubhani eMpuma Kapa
NguMonwabisi Khininda
Iphondo leMpuma Kapa lihlaselwe ziintlekele ezisube imiphefumlo yabantu,zashiya abantu bengenakhaya,ukonakaliswa kweendlela ukuqhawuka kweentambo zombane.Kwisitthili sase-OR Tambo isikhukhula samanzi ebesivela ngaseMpeko, libulele abantu kwindawo yaseDecolyn naseNorwood eMthatha.Le ntlekele isube imiphefumlo yabantu abakumashumi alithoba kuquka nabantwana besikolo abalishumi elinesithathu ekuquka nomqhubi webhasi encinci,ebihambisa abantwana besikolo saseJumba.Le bhasi ikhukhuliswe ngamanzi kwibhulorho ese-EFATA. Abantu abakwiwaka bashiyeke bengenamakhaya.Umoya ovuthuzayo usiphule amaphahla ezindlu kumasipala waseMbhashe eDutywa.Kanti umasipala waseAlfred Nzo ne Joe Gqabi ugutyungelwe likhephe elibulele intlaninge yemfuyo.Kummandla waseAmathole eMonti kuhlasele umoya owise imithi eyonakailse iintambo zombane kwadaleka neengozi ezindleleni.Kusweleke abakhweli abahlanu kwingozi eyenzeke phakathi kweCintsa neBraakfontein kude kufuphi nedolophu yaseMonti.Le ngozi yenzeke ngethuba umqhubi wekhombi ebezama ukuphepha umthi owele endleleni.
UMphathiswa wesebe leZorhulumento ngoBambisano neMicimbi yeMveli uVelenkosini Hlabisa uthe imilenze yomithathu karhulumento mayibambisane kususwe abantu abokhe ngasemilanjeni ukuze kungaphinde kubekho intlekele efana nale yenzeke eDecolyn.UMongameli Cyril Ramaphosa naye uye wazozibonela umonakalo watsho esithi kudingeka uncedo olukhawulezileyo.Uthe ukuguquguquka kwemozulu (climate change) ngunozala walentlekele.Uzibophelele ngelithi urhulumente uzoncedisa ukuxhasa iintsapho zamaxhoba.Phakathi kwemibutho engenelele ngelincedisayo,ngaphandle kweGift of The Givers iKumkanai yabaThembu uZwelibanzi Dalindyebo naye ungenelele kunye neBlack Coffee Foundation neminye.
IMIFANEKISO :
- Imizi edada emanzini eNorwood eMthatha
- Isikolo saseGuqaza eLibode esimke nomoya.
- Ikhombi ekhalele indlela yangqengqa ngecala yabulala abakhweli abahlanu
- Ingqimba zekhephu eMount Frere
