Abaxhamli besibonelelo sikarhulumente beme kumgca wokurhweba ngaphandle kweposi eGatesville, eKapa kusasa ngoLwesihlanu odlulileyo. Abantu abaninzi bebelindele ukufumana izibonelelo zabo emva kokusilela kwenkqubo ePost bank ekuqaleni kweveki ephilileyo kulibazise ukuhlawulwa. Umfanekiso: Ella Morrison - GroundUp
CommunityLocalNews

Omnye ukhomb’omnye esweni nge grant phakathi ka SASSA no Post Bank

2 years Dizindaba 98 Views

14 EyoMsintsi 2023 – Intatheli kaDizindaba

EKAPA

Ibizizihlwele zeenkonde nee nkondekazi kuquka nabo bakhubazekileyo ebebeshiyeke bevutha ngumsindo emveni kokuba ingakhange iphume imali yesibonelelo senkamnkam ngomhla wokwamnkela.  Bona abo basemagunyeni kwa SASSA no Post Bank bebekhombana ngomnwe esweni logama omnye evikela iliso lakhe ngenxa yokufeda kweminxeba yanxibelelwano (Computer systems).  Kanti bona abombutho olwela ukuhlawulwa kwe nkamnkam iPay the grants nomelwe ngu Sekela sihlalo uElizabeth Ryters uvakalise okokuba bengulo mbutho bebesazi ngalo “Duntsu Bhaka” yaye bebesoloko befuna eyona ngxaki kuSASSA nabakwa Post Bank.

Omnye wee nkondekazi umama Nonceba Makaula wase Gugulethu uvakalise okukhulu ukukhathazeka koku kungafumaneki kwe mali.  Lo makhulu uthe: “Ngaphezu kwayo le ngxaki yokukhathazeka bendinayo ibe yinto ethe yasehlela phaya eMall nalapho kuthe waquleka omnye umakhulu ngenxa yale ngxaki yokungaphumi kwale mali yenkamnkam.  Apho kuthe kwanyanzeleka kwenziwe amatiletile ukunceda lo makhulu obencwina elele ngomqolo.  Kufumaniseke okokuba lo makhulu wehlelwe koku kuba kude kwaba lusuku lwesithathu ephoswa ngapha nangapha yona imali ingade ivele,” utshilo umama uMakaula.

Kuvakala okokuba le ngxaki ayikhange ibe yeyabadala bodwa koko nabo bakhubazekileyo nalapho abanye babo bayifumene ingaphelelanga.  Kuthiwa lona uninzi lwabo nelamnkela ngee bhanki belusuke lufike ukhumsha umatshini we ATM usithi “Decline”.

Bona abasemfuthweni wolwazi bathe kufumaniseke okokuba ukusukela ku Lwesibini wale veki iye yamana ingaphazeka ifumaneka le mali yendodla kwabanye.  Kodwa bona abombutho iPay the Grants ngesithethi sawo unkosazana Ruiters uthe: “Bona abakwa SASSA kunye ne Post Bank babethwa nje kukulungisa izinto kwangoko kuba kwenzeka njani okokuba roqo bemana bejongana nengxaki ye IT.  Abasakuboni okokuba oku kuchaphazela kakhulu abo basokolayo,” utshilo.

Kwelinye icala kuvakala okokuba oku kubone oo “Matshonisa” nabo besokola kuba bethiwe mbende ngabo befuna ukuboleka kwakho.