Abaxhamli baye bathintelwa ekufumaneni isibonelelo se-R350 emva kokuba amaqhophololo etshintshe iinombolo zeeseli zabo
I-SASSA ithi isibonelelo se-SRD sibeke umthwalo omkhulu kwi-arhente kwaye iceba ukuphumeza isoftware entsha ukunceda ukuthintela ubuqhophololo.
UBonginkosi Nxumalo, utitshala ongaphangeliyo waseDaveyton eBenoni, ufumana iR350 yenkxaso yeNtlalo yokuNceda kwiNtlupheko (SRD) nyanga nganye ukusukela oko yathi yaziswa ngexesha lokuvalwa kweCovid-19 ngo-2020.
Kodwa ngeyoMqungu ka-2023, wafumana iSMS evela kwi-Arhente yoKhuseleko lwezeNtlalo yoMzantsi Afrika (SASSA) imxelela ukuba inombolo yeselula yakhe itshintshiwe. Emva kokufumana lo myalezo, akazange aphinde afumane iintlawulo zenyanga.
Uzamile amatyeli amaninzi ukuxela ubuqhophololo kwaSASSA nge-imeyile. Ngalo lonke ixesha exelelwa ukuba ityala lakhe liye lanyuswa. Ngoku sekusemva konyaka uNxumalo akakancedwa. Ungomnye wabantu abakhe bakhalaza kwiGroundUp kwezi veki zidlulileyo, besithi baqhathwa kwaye abasayifumani le nkxaso-mali yeR350.
UNxumalo ebethembele kwizipho ezisuka kwizalamane zakhe nokwenza amaqhekezana ukuze aphile.
U-Elizabeth Raiters, okhokela idesika yoncedo lwesibonelelo sezentlalo kwi #PayTheGrants, uthi ufumene amakhulukhulu ezikhalazo ezifanayo kubantu kwilizwe liphela.
URaiters uthi impendulo ye-SASSA kwiingxelo zokuqala zotshintsho lwenombolo yeeseli ezingagunyaziswanga ibe kukuthintela abamkeli ekutshintsheni amanani abo kwi-Intanethi. Abafumana uncedo kufuneka batsalele umnxeba kwidesika yoncedo yakwa-SASSA. Baye ke bathunyelwe i-OTP kwinombolo yeselula ebhaliswe ngoku kwinkqubo ye-SASSA, ukuze kugunyaziswe utshintsho. Kodwa kubaxhamli abafana noNxumalo abathe iinombolo zabo zeeseli zathathwa ngabantu abanobuqhophololo, le nkqubo ililize.
URaiters uthi ukongeza kutshintsho lweenombolo zeeseli ezingagunyaziswanga, i-#PayTheGrants iqaphele ukuba abafaki-zicelo abatsha besibonelelo seR350 abagqiba iminyaka eyi-18 ngo-2023 bafumanise ukuba iinombolo zabo zezazisi sele zisetyenziswa, nto leyo ebathintela ekubeni bangasifumani isibonelelo.
Isithethi sakwaSASSA, uPaseka Letsatsi, uxelele iGroundUp ukuba icandelo lobuqhophololo lakwaSASSA lijongene nezithintelo kunye nomthamo omkhulu wamatyala amalunga neR350 yegranti yeSRD.
Inani labaxhamli begranti ye-SRD liyohluka phakathi kwe-7.5-yezigidi kunye ne-8.5-yezigidi njengoko abaxhamli bephantsi kovavanyo lwenyanga lweendlela.
ULetsatsi uthe igranti yeSRD “yeyona nkxaso-mali ikhula ngokukhawuleza kwimbali yoncedo loluntu kweli lizwe”, ibeke umthwalo omkhulu kuSASSA wokuyilawula nokuthintela ubuqhophololo.
U-SASSA uphuhlisa isoftware yokuqaphela ubuso ukuqinisa inkqubo yoqinisekiso lwesazisi kwesi sibonelelo, utshilo uLetsatsi. Isoftware kulindeleke ukuba iphunyezwe kunyaka-mali ka-2024/2025.
ULetsatsi khange aphendule imibuzo malunga nemeko yobuqhophololo kaNxumalo ngethuba ipapashwa kodwa uthe isebe lobuqhophololo lakwaSASSA libeke phambili amatyala obuqhophololo obenziwe ngabasebenzi bakarhulumente.