Amanina aseMqanduli abhinqe omfutshane
27 Isilimela (June) 2024 – 10 EyeKhala (July) 2024 – Monwabisi Khininda
Mqanduli
Abasetyhini kwilali iZibhodla, kuHala eMqanduli babhinqe omfutshane bezama ukuhlangula abasetyhini abajongene nobunzima emakhaya. Le lali ijongene nolutsha oluzintyintya ngobhelu lomsele, ngeziyobisi, olukhulelwa luselula, oludinga imisebenzi nezakhono zokuziphilisa.
Ngabasetyhini abalikhulu namashumi amathathu anesithoba abahlanganise iintloko basungula umbutho wokusithana imihlana ngexesha lobunzima. USihlalo walamanina uNondumiso Nkosiyane uthi badinga ukuncedwa ngophuhliso lwezakhono ukuze bakwazi ukuziphilisa. “Sizama ukuhlangula amanina kwintswelo ngqesho nokuxhatshazwa ngamadoda. Sinomnqweno wokwakhelwa iziko lophuhliso lwezakhono kulutsha lwasetyhini. Sifuna ulutsha luzenzela imali kungapheleli ekuqeshweni kuphela,” kucacisa uNkosiyane.
Ukanti olu lutsha lukwasungule iqumrhu elibizwa Hala Burial Society ngenjongo zokunceda kumakhaya ahluphekayo ngexesha lobunzima. Lubetha imali lunikele ngayo ngaphandele kokulindela inzuzo. UNkosiyane uthi ukuxhatshazwa kwamanina kwindawo zentselo zezinye zeengxaki abajongene nazo. Ukwathe bangavuya ukuba kungakhwetywa amaqumrhu abafundisa ngeendlela zokuphila bazosinda emigibeni yongendawo.
