Izotshutshiswa inkwenkwe ekhuleliswe imveku

16 EyoMqungu 2025 – 29 EyoMqungu 2025

Monwabisi Khininda

UBukiwe Fanta onguMphathiswa wesebe leZophuhliso loLuntu umemelela ukuba itshutshiswe inkwenkwe ekhuleliswe intombazana eneshumi elinesibini leminyaka ubudala. Le ntombazana eneshumi elinesibini leminyaka ubudala izele umntwana oyintombazana kwisibhedlele iFrontier kuKomani ngomhla weNyibidyali. Isebe le Zempilo eMpuma Kapa lamkele iintsana ezilikhulu neshumi elinesibini (112) ngolusuku kwiphondo liphela.Kubadlezana abaselula abalishumi elinane kukho intombazana eneshumi elinesibini leminyaka.

UMphathiswa uFanta uthe uyise walomntwana ononina oneshumi elinambini leminyaka uzakuthi atshutshiswe akudibanisa ishumi elinesibhozo leminyaka. “Isothusile eyomntwana oneshumi elinambini leminyaka ozeleyo.Kutyholwa ukuba le ntombazana yadlwengulwa, makuqaliswe kuphandwe ityala lodlwengulo kwangoku.” UFanta uyibethelele eyokuba ukwabelana ngesondo nemveku lityala.

Kanti uMphathiswa weZempilo kwiphondo iMpuma Kapa uNtandokazi Capa uyalele ukuba makuvulwe uphando lodlwengulo nesebe loPhuhliso loLuntu lingenelele. “Le ntombazana igcinwe esibhedlele de kuphethwe uphando,” kutsho uCapa.Kwiphondo iKwaZulu-Natal uNomagugu Simelane uvakalise inkxalabo ngamantombazana aneminyaka elishumi elinesithandathu awayeyobeleka ngomhla weNyibidyali. “Sixhalabile kuba intombazana eneshumi elinesithandathu leminyaka yakubeleka ubomi buyatshintsha naphakade. Ukukhulelwa kwabantwana abaselula kudala iingxaki zempilo kumntwana nakunina.”