Kubanjwe amadoda amabini ngokubulala izithandwa zawo
16 EyoMqungu 2025 – 29 EyoMqungu 2025
Intatheli kaDizindaba
Amapolisa kwisithili sase-O.R Tambo anqakule amadoda amabini ngokubandakanyeka kwiziganeko zokubulawa kwamaqabane awo. Oku kwenzeke kwiziganeko ezibini ezahlukeneyo. Ingxelo yamapolisa idiza ukuba kubusuku bangoMvulo kwisithuba sika- 23.h00 ebusuku kwilali iNkonkweni kuQumbu, umrhanelwa oneminyaka eyi-32 ubudala ubulele umfazi wakhe oneminyaka eyi-24 kulandela ingxabano ngokuthandana ngaphandle. Umrhanelwa ubanjwe wavalelwa, kulindeleke avele enkundleni yamatyala kuQumbu ingaphelanga leveki.
Kanti kwesinye isiganeko kwilali iMancam, eLower Ngqungqu eMqanduli kubanjwe indoda eneminyaka engama-47 ubudala ngokukrwitsha ngebhanti ibulale iqabane layo elineminyaka eyi-40 ubudala. Isithethi samapolisa uCaptain Welile Matyolo uthi iinkcukacha ezikwisandla samapolisa ziveza ukuba umrhanelwa ubethwe kanobom ngabahlali ngaphambi kokubanjwa kwakhe ngamagosa akwantsasana.Usagcinwe esibhedlele phantsi kweliso lamapolisa,uzovela enkundleni yamatyala eMqanduli kungekudala.
UMkomishinala wamapolisa kwisithili uMajor General Norman Modishana uvakalise ukothuka zezindaba zokubhubha kwamanina amabini ebulawa ngamaqabane awo athembisa ngokubathanda abakhusele.Udlulise amazwi ovelwano kwiintsapho zamaxhoba.