USodolophu Ucela iNgcaciso eNgxamisekileyo yeSAPS emva kogqogqo kwii-Ofisi zeSixeko

30 EyoMqungu (Jan) 2025 – 12 EyoMbumba (Feb) 2025

Intatheli kaDizindaba

USodolophu waseKapa uGeordin Hill-Lewis umemelele amagqabantshintshi angxamisekileyo kwiNkonzo yamaPolisa oMzantsi Afrika (SAPS) kulandela ugqogqo kwii-ofisi zamalungu amabini eKomiti kaSodolophu, uAlderman JP Smith no-Alderman Xanthea Limberg, ngoLwesihlanu, nge-24 kaJanuwari.  

Kwingxelo, uSodolophu uqinisekisile ukuba omabini la malungu ekomiti asebenzisane ngokupheleleyo nabasemagunyeni, nangona engakhange aziswe ngezityholo ezijoliswe kuwo. 

“Ndiqaphela ugqogqo lwabasemagunyeni kwii-ofisi zika-Alderman Smith no-Alderman Limberg,” utshilo u-Hill-Lewis.

 “Baye bandazisa ngentsebenziswano yabo epheleleyo neSAPS kodwa abakade baziswe ngobunjani bezityholo.  

USodolophu uHill-Lewis ubethelele ukubaluleka kokwenza izinto elubala nokucaca kwimiba elolu hlobo. 

“Ndicele inkcazo engxamisekileyo kwiSAPS ukuze ndiqonde iinkcukacha zeli tyala. Nje ukuba ndilufumene olu lwazi, ndiza kugqiba amanyathelo ayimfuneko.”  

USodolophu ukwabhekisele kwityala langaphambili elibandakanya elinye iLungu leKomiti kaSodolophu, uMalusi Booi, echaza ukuba iSAPS inike ingxelo ebanzi ngelo xesha. “Ndinikelwe ndaza ndanikwa inkcazelo epheleleyo ngamapolisa malunga nomba wangaphambili obandakanya uMalusi Booi, kwaye ndicele imbeko efanayo kweli tyala ngokukhawuleza,” wongeze watsho.  

  Ikhwelo likaSodolophu ligxininisa ukuzinikela kweSixeko kuxanduva lokuphendula kunye nenkqubo efanelekileyo, njengoko abahlali belindele ingcaciso engaphezulu malunga nale meko iqhubekayo.  

  Abasemagunyeni abakaphawuli esidlangalaleni malunga neenkcukacha zogqogqo okanye izityholo ezibandakanyekayo.