Kubanjwe abaphangi ababini eDimbaza
Yintatheli yeKhwezi
Amapolisa anqakule avalela abarhanelwa ababini kulandela ukuphangwa kwevenkile iYeyethu nokuqhushumbiswa komatshini wokhupha imali (Automatic Teller Machine) ngoLwesihlanu weveki ephelileyo.Ngokwengxelo yabaphandi betyala esi siganeko sehle ngenstimbi yokuqala ngentseni xa izijem-jem ebezixhobe zif’acala ziye zambonzeleka kwivenkil yaseDimbaza eMpuma Kapa.Kwangaxeshanye abarhanelwa baqhushumbise i-ATM ezine.Kuvakala ukuba abemi abane belizwe lase-Ethiopia abebelele ngaphakathi evenkile bakwazile ukusaba baphuma bengenawo nomkrewelo womonzakalo.Amapolisa afumene amakhoba emipu,ekucaca ukuba kukhe kwakho ukudubula.
Amapolisa adize ukuba abarhanelwa basebenzise iimoto ezintathu ukusaba besingise ngakwidolophu yaseQonce.Ngelixa amapolisa eqhuba uphando amagosa aphezulu aseMdantsane neFlying Squad yaseQonce kubanjwe umrhanelwa omnye kufuphi nakwaRhayi kuhola wendlela osingisa eMakana.Kufunyenwe isiqhushumbisi,iToyota RunX eluhlaza ekurhanelwa ukuba yebiwe nesixamali esingachazwanga,semali enamachaphaza e-inki.
Kwelinye icala, amapolisa abambe umrhanelwa wesibini kuKomani.Kurhanelwa ukuba ufunyenwe enemali enemachaphaza einki ekukholelwa ukuba yimali efunyenwe xa kuqhushumba ii-ATM.Umrhanelwa ebesingise eRhawutini ngokutsho kwamapolisa.Kusenjalo imoto ebomvu yohlobo lwe-Volkswagen Polo ekukholelwa ukuba ibisetyenziswa ngabaphangi, iye yabhaqwa ishiywe kufutshane neTamara emva kokubandakanyeka kwingozi yendlela.Abarhanelwa babaleke ngeenyawo kwaye isithuthi sagcinwa ngamalungu eTamara Vispol.Amapolisa akhangela abarhanelwa ababaleke ngesithuthi sesithathu.
La madoda abanjiweyo ajongene namatyala aquka ukuphanga ishishini,ukwaphula umthetho weziqhushumbisi,ukuzama ukubulala,nokuphanga exhobe ngemipu.Ibambela loMkomishinala weMpuma Kapa uNjengele Thandiswa Kupiso uyincomile indlela amapolisa as abele ngayo kwesi siganeko. “Umsebenzi okhawulezayo nentsebenziswano yamalungu ethu uqinisekisile ukuba abarhanelwa abayingozi bayakhangelwa ngokukhawuleza.Siza kuqhubeka nokulandela umkhondo oqinileyo kwaye kubanjwe abanye abarhanelwa,”utshilo uKupiso.
