IFuture United FC U15 iphumelele indebe yeGqudu Youth Development Tournament
Intatheli: Anele Raziya| Gcuwa
Owayesakuba ngumdlali kwiqela laseGcuwa, iBlackburn Rovers FC, uMzothando “Bhuti Gqudu” Makhala bekubanjwe itumente yebhola ekhatywayo egameni lakhe kubhiyozelwa igalelo lakhe kwezemidlalo ngale mpeveki siphuma kuyo.
Amaqela webhola ekhatywayo aseMnquma ebekhuphisana kwitumente yebhola ebizwa ngokuba yi Gqudu Youth Development tournament U/13 and U/15 nethiywe egameni lika Makhala.
Injongo zale midlalo ibikubhiyozela imisebenzi nendima edlalwe nguBhuti Gqudu ngexesha wayesadlala ibhola waphinda wabuya wangumqeqeshi weBlackburn Rovers FC nawaqala ukuyidlale eseneminyaka engaphantsi kweshumi elinesine.
Ukanti ezinye zenjongo zale tumente ekuncediseni ukuphuhlisa ezemidlalo eMnquma ingakumbi ibhola ekhatywayo.
Amaqela ebangama 32 ebekhuphisa kule tumente yokuvuyisana nemisebenzi emihle eyenziwe nguBhuti Gqudu.
Amaqela alishumi elinesithandathu (16) ebekhuphisana kwabo baneminyaka engaphantsi kwishumi elinesithathi (13) logama namanye amaqela akwaleli nani (another 16) ebekhuphisana kumaqala wabaneminyaka engaphantsi kwishumi elinesihlanu (15).
Onke lamaqela ebedlala apho ayinxalenye yee league zasekuhlaleni nezingaphantsi kweMnquma local football Association (Mnquma LFA).
Imidlalo ibiqhutyelwa kwibala laseColoured cebu kuhle kwidolophu yaseGcuwa kunye nakwibala laseBrewery uqala ngoMgqibelo kusasa uyokuma ngeCawe.
IFingo United FC yelokishi yaseNew Rest eMnquma ibeyiyo ezintshatsheli kwidyogwana ezineminyaka engaphantsi kwishumi elinesithathu, emveni kokuba ibethe Ambitious FC yaseMchubakazi ngo4-3 kwipenalthi emva kodlala ntanganye ngenqaku macala (1-1) ebaleni.
IFuture United FC yaseGcuwa yona ibezintshatsheli kwabo baneminyaka engaphantsi kweshumi elinesihlanu, emveni kokuba izibethele Ambitious FC ngo5-4 kwipenalthi emva kodlala ngenqaku macala (1-1) ebaleni.
Iintshatsheli zetumente ziye zanikwa indebe qela ngalinye kunye neembasa zeegolide.
Lawo amaqela abethwe kumdlalo wamagqibela kankqoyi afumene imbasa zesilivere.
UBhuti Gqudu uthe kubeluvuyo kuye ubona kuququzelelwa imidlalo egameni lakhe esaphila kwaye uthe yonke lonto iza kuncedisa nokuphuhliso kwabadlali abasakhulayo.
Uqhube wathi uyanqwenela ukuba urhulumente enze ngako konke okusemandleni uqinisekisa ukuba kwakhiwa amabala asemngangathweni ezilalini nasezilokishi.
Uthe ukuphuculwa komngangatho wamabala lonto iyakunceda kakhulu nakwicala lokhulisa abadlali batsho baphuhle ngokugqibeleleyo kumakhono wabo.
Uye wabulela neButterworth Former Stars neMnquma LFA ngokuba bethe basindleka letumente ibhiyozela imisebenzi yakhe.
IButterworth Former Stars liqela elenziwe ngabadlali ebabeqeqeshwa nguBhuti Gqudu ngexesha wayengumqeqeshi weBlackburn Rovers FC kwaye oka Makhala uthe uyawubulela umsebenzi wababadlali wayebaqeqesha ngokuthi bancedise ekuphuhliseni abantwana abasakhulayo ebholeni.
UWanda Mtwa owayesakuba ngumdlali weBlackburn Rovers FC nongomnye wabaququzeleli bale tumente, uthe nakunyaka ozayo bazakuphinda bayisindleke itumente njengoko injongo zabo ikuvelisa abadlali abazakudlala kumngangatho ophezulu njenge Premier Soccer league.
