Inqununu idyarhaze imali yabafundi
Intatheli: Monwabisi Khininda | Mdantsane
Inqununu yesikolo samabanga aphakamileyo nesaziwa ngokuphumelela emagqabini kwiimviwo zikamatriki i-Ulwazi nezinze kwilokishi yaseMdantsane eMonti, kutyholwa ukuba idyarhaze imali engaphaya kwesigidi (R1m) nebilungiselelwe ukuthenga ukutya, izixhobo zokufunda kunye nokulungisa ezinye izinto zesikolo.Iingxelo zityhola ngelithi le nqununu uMihlali Makhalima uyidyarhaze le mali ekuthengeni utywala,esitya kwindawo zokutyela zodidi, egalela amafutha kunye nobunye ubunewu-newu bengcungcu.
Amaxwebhu ebhanka aveza ukuba isixa-mali esingange R250 000.00 sidyarhazwe kwindawo zokutyela zodidi oluphezulu eGrazia Fine Food & Wine kunye naseLa Granto eMonti. Ukanti isixa-mali esingange R450 000.00 siveza ukuba sikhutshwe koomatshini babhanka abohlukeneyo, sona isixa-semali esingange R220 000.00 sikhutshwe ezivenkileni ezahlukeneyo,ze imali ekhutshwayo ngenynaga iqikelelwe kwi-R42 000.00. Ukongeza enye imali ibonakaliswa idyarhazwa kwindawo ezohlukeneyo ezifana naseHungry Lion, kwaPEP, Boxer, Shoprite, kwindawo ezoja inyama, kwindawo ezithengisa utywala,kwindawo yentselo eKoneni Lounge. Kwiindawo zokuhlamba izithuthi, kwakunye nakwiindawo ezithengisa izinto zokwakha.
Ngexesha exinwe ekoneni liphephandaba iSunday Times uMakhalima uzithethelele ngelithi: “Le ndawo niyibonayo yotywala bendingathengi butywala bendithenga inyama kuthengiswa utywala nenyama apho.”Omnye wabafundi,kubafundi abayi 1,200 ucacisile ukuba batya njani esikolweni: “Sitya umngqusho ongenanto,sitye irice enezibindi zenkukhu okanye sitye irice enekhaphetshu.” Ukanti uMakhalima unqwalile ukuba xa bechophele intlanganiso engapha kweeyure ezine baye bazinomfe ngo-KFC nanjengoko iyinto ekumqulu leyo,iintlanganiso zesigqeba (SGB) solawulo lesikolo kunye neqoqo eliphezulu zichotshelwa rhoqo ngoLwesibini kwaye bazinomfa ngo-KFC rhoqo.
Amaxwebhu ebhanka akwaveza ukuba isigqeba solawulo lesikolo kunye nabanye abafundisi-ntsapho baxhamle kwimali,begalela amafutha ezithuthi bethenga nokutya. Ukanti esinye istatement siveza inqununu ithenga eChina Mall eMonti, kodwa wale kwaphela ukuphefumla. Othethel isebe lezeMfundo eMpuma Kapa uMalibongwe Mtima ungqinile ukuba bamrhoxisile emsebenzini lona kaMakhalima esihlalweni sakhe, kwaye uphando luyaqhuba.
