Kukhalinywa ukutshiswa kwamathala eencwadi

08 kuTshazimpuzi (Apr) 2024 – Monwabisi Khininda

Isebe leZemidlalo uLonwabo uBugcisa neNkcubeko kwisithili sase-O.R Tambo linomgoza abantu bohlukane nomkhuba wokutshisa amathala eencwadi ngethuba logwayimbo lweenkonzo ezingundoqo. Eli sebe lenze isimemelelo ngethuba lomsitho weveki yamathala obubanjelwe eTombo kwidolophu yasePort. St. Johns.

Le veki ibhiyozelwa rhoqo ngonyaka ukukhuthaza uluntu liwasebenzisa ukufumana ulwazi ngokufunda. Ummandla we-O.R Tambo unamathala eencwadi angamashumi amabini anesithoba ubuncinane.Isekela Mqondisni uLwandile Dastile uthe: “Sibhenela kuluntu lwakuthi ukuba lubone amathala njengendawo yokusenga ulwazi,indawo ezinenkonzo eziluncedo eziquka i-intanethi ezijonge ukutshintsha ubomi babanru.”

UDastile uthi bakhethe indawo yaseTombo eyilali ngenjongo zokubonisa ukuba amathala eencwadi asemaphandleni anikezela iinkonzo ezifanayo nawasezidolophini. Kuhlalutywe iincwadi zababhali abaliqela logama abagwebi bebebaze indlebe kupelo lwamagama. UFezeka Mafeke olilungu lekomiti kaSodolophu ePort.St.Johns uthe: “Siyawuvuyela umsitho wokubhiyozela kukhuthazwe ukusetyenziswa kwamathala eencwadi. Asikho isixhobo sokugxotha ikati eziko ngaphandle kwemfundo.”

Umbhali wencwadi uYonela Ngqokelela olilungu lombutho wamanina angababhali eMpuma Kapa ukhuthaze abafundi bezikolo ezahlukeneyo ukuba baphuhlise izakhono zokubhala iincwadi ezizongeniswa kumathala eencwadi. Izikolo ebezizimase lo msitho bezisuka koomasipala abahlanu ziquka iNoah Christian Academy,i-K.T Mchasa, iPort St. Johns High nezinye.