UMphathiswa uHlabisa utyelele uKumkani wamaMpondomise

Intatheli: Monwabisi Khininda | Qumbu

UMphathiswa wesebe lezoLawulo Ngentsebenziswano neMicimbi yeMveli kuzwelonke uVelenkosini Hlabisa ephelekwe lisekela lakhe uNkosana Zolile Burns-Ncamashe batyelele iKumkani yamaMpondomise, uKumkani Zwelonke Matiwane wesizwe samaMpondomise kuQumbu, phantsi komasipala waseMhlontlo.

Olu tyelelo lulandela isicelo seKumkani sentlanganiso yokushukuxa imiba echaphazela amaMpondomise equka imeko yamabhunga, ukubuyiselwa koLawulo lweMveli ngokwamanqanaba alo. Kule ntlanganiso kwiveki ephelileyo komkhulu, iKumkani uMatiwane yondlale imiba ngesi sizwe samaMpondomise ngethuba lorhulumente wegcuntswana labamhlophe, imbali ngendlela obubuyiselwe ngayo ubukumkani kuquka isidima nokuzazi kwesi sizwe.

Kwelakhe icala uMphathiswa uHlabisa ubulele ithuba lokuxoxa neKumkani eveza ukuzibophelela kukarhulumente ukuqinisa intsebenziswano nesikhokelo semveli njengentsika yokuqinisa ubukho borhulumente okhethwe sisininzi. “Singurhulumente omnye ogunyaziswa kukulawula ngentsebenziswano. Into efuna urhulumente kaZwelonke siza kuhamba nayo sibheke phambili, efuna urhulumente wephondo iza kudluliswa ngendlela yayo,” kutsho uHlabisa.

UMphathiswa uphinde waphawula ngemfuneko yokuphucula imeko yamabhotwe watsho esithi urhulumente wenza imitsi ukulungisa lonto ngokubekelwa bucala kwesabelo mali. Ukwavakalise inkxalabo ngokubhubha nokonzakala kwabakhwetha okuthe gqolo ukwenzeka emabhumeni esithi makusetyenziswane ukukhusela isidima selisiko lolwaluko.