Kunqakulwe kwavalelwa abasolwa ngokuqhushumbisa iimoto zemali

11 May 2023 – Monwabisi Khininda

KUQUMBU– Amapolisa akuQumbu anqakule avalela amadoda ekudala efunwa ekusolakala ukuba ngawo aqhushumbisa iimoto ezihambisa imali.Lo mkhuba wokuxhonyiswa kuqhushumbiswe iimoto ezihambisa imali (Cash-In-Transit Heists), usuke waxhaphaka kwingingqi ye-OR Tambo.

Sibhala nje sekubanjwe abarhanelwa abathathu kwaze kwathinjwa iziqhushumbisi, imikhono yekati,nentaphane yeembumbulu emva kogqogqo olwenziwe kuQumbu, kuTsolo naseMthatha libutho le-Hawks eliphanda ngezi ziganeko.

Kugqogqo lokuqala nolunxulumene nokuxhonyiswa kwesithuthi semali kuhola wendlela u-N2 ngakuTsolo kutsha nje,kubanjwe indoda eneminyaka engamashumi amabini anesihlanu kwilali yakuNomhala kuTsolo emva kokufunyanwa ineziqhushumbisi ngokungekho mthethweni.Ngokutsho kwengxelo kaCaptain Yolisa Mgolodela osisithethi seHawks eMpuma Kapa amapolisa edlulele kwenye indawo ekuQumbu ekuthiwa yindawo yeRDP nalapho kubanjwe unogada ofunyenwe eneziqhushumbisi ,umbayimbayi wohlobo lwe-AK.47 nentlaninge yeembumbulu, umpu wohlobo lwe-9mm, izingxobo zemali zenkampani ethutha imali uFidelity, ireflector jacket yamapolisa, ireflector jacket yamagosa esikhululo seenqwelo moya nomnqwazi wamapolisa.

Ukanti kugqogqo oluqhutywe kwenye ilali yaseLuqoqweni kwalapho kuQumbu unogada uphoncuke selevingcelwe ngamapolisa,kodwa kwafunyanwa umpu wohlobo lwe-303 rifle. Kulindeleke avele enkundleni yaseLibode umrhanelwa waseLusikisiki nobanjwe eMthatha kwiveki ephelileyo ngokunxulumene neziganeko eziliqela zokuxhonyiswa kwezithuthi zemali ezenzeke kwiidolophu zephondo leMpuma Kapa.

“Ibutho leHawks eliphanda ngamatyala anxulumene ne- Cash- In –Transit libambisene nelinye elibizwa ngokuba yi-Tactical Response Team (TRT), libambe umrhanelwa oneminyaka engamashumi amane anesibini (42) kugqogqo olwenziwe kwisikhululo setekisi saseCircus Triangle eMthatha kwiveki ephelileyo. Le ndoda ibanjwe phantsi kwezityholo zokufunyanwa inompu neembumbulu ngokungekho mthethweni. Kuthinjwe nemfonomfono yomrhanelwa kologqogqo,” utshilo ingxelo kaMgolodela.” Uphando lusaqhuba kwaye kulindeleke ukuba kubanjwe abanye abarhanelwa nanini na.” uqukumbele ngelo uMgolodela.