Ubusela bemfuyo ngunozala wempi eqhubeka eSajonisi
11 May 2023 – Monwabisi Khininda
ESAJONISI– UMphathiswa wamapolisa kuzwelonke uNjengele Bheki Cele uthi ayisoze ivunyelwe eyokulaliswa koomama nabantwana emahlathini ngenxa yempi eqhubayo eMajola ePort St. Johns. UGeneral Cele ebethetha kwimbizo ebibanjelwe eNqileni eMajola ngoMvulo wale veki. Iinjongo zaleMbizo ibikukumamela izikhalazo zabahlali, neziphakamiso ngeendlela ekungapheliswa ngayo impalalo gazi esele ichithe ngaphaya kweminyaka engamashumi amabini iqhuba.
Sele ishiye kutshiswe imizi elinganiselwa kwi-140 loogama beqabele kumashumi amabini abantu asele bebulewe kuleminyaka mithathu idlulileyo. Ngokutsho kwabahlali ulwebiwo lweebhokhwe ezintathu kwilali yakuGangatha ngunozala wempi eqhubayo. Ukanti obu busela balandelwa ziinkomo ezebiwa eLwandlana zayolandwa ngamadoda aseMhlotsheni.
Evula nje umlomo kuleMbizo uCele uthe: “Asizuxhamazela ukujongana nalemeko,asizuvuma ukufakwa ngentloko.Zingaphelanga iiyure eziyi-72, amapolisa abizwa Amaberet (National Intervention Unit and Tactical Response Team) azobe elapha ezosebenza. Asizuthatha mapolisa apha sizowalanda kwezinye iindawo. Sizokongeza abaphandi abazothatha onke amatyala alapha eMajola,” utshilo uCele.
UGen.Cele uthi ngethuba ejikeleza namhlanje ufike imizi ikhala ibhungane. “Abantu baphila okwezilwanyana luloyiko. Sizoqinisekisa abantu babuyela emizini yabo,ayisoze ibeyiyo eyokubulawa kwabantwana besikolo. Sizozisa ihelicopter nezithuthi zamapolisa ezihlanu ukuzoncedisa.Simbhalele uMongameli sicela amajoni azoncedisa,” kutsho uCele.
Umhlali uZwelinzima Msiselwa welali uSiphu-Siphu uthe into engazisa uzinzo kukuphakanyiswa koxolo kungalandwa imvelaphi yempi. Omnye umhlali uNolungile Noniwe uthe bashiyeke bengenawo amadoda abulawe bejamile.Uthi balala phandle okwezilwanyana. Uvakalise ithemba emva kokufika kukaBheki Cele.
Le mbizo ibizinyaswe ziziphathamandla esipoliseni eziquka uFannie Masemola onguMkomishinala wamapolisa kuzwelonke, uXolile Nqatha weSebe loKhuselo loLuntu ephondweni nabanye.
